Qurmanǵazy atyndaǵy Qazaq memlekettik akademıalyq halyq aspaptar orkestri men Ǵabıt Músirepov atyndaǵy balalar jáne jasóspirimder teatrynyń birlesken «Abaıdan amanat» konsert-spektakliniń túsirilimi bastaldy.

Qazaqtyń oıshyly Abaı Qunanbaevtyń 175 jyldyǵyna oraı uıymdastyrylǵan sharaǵa Mádenıet jáne sport mınıstrligi qoldaý bildirip otyr. Tyń jobada akterlerdiń qoıylymy orkestr mýzykasymen súıemeldenip, kórermenge aqynnyń taǵdyryna shynaıy túrde úńilýge múmkindik beredi.

«Abaıdan amanat» Abaıdyń bala kezinen úlkeıgen shaǵyna deıingi qoıylymdardyń barlyǵy osy jerde qoıylady. Qurmanǵazy orkestriniń súıemeldeýimen jáne Ǵabıt Músirepov atyndaǵy teatrdyń akterlary oınaýymenen eki mekemeniń birlesken sharasy. Bul endi televızıalyq joba bolǵan soń, jýyrda Abaı telearnasynan kórsetiletin bolady», – dedi Qurmanǵazy atyndaǵy Qazaq memlekettik akademıalyq halyq aspaptar orkestriniń dırektory Medet Qýanyshev.

Konsert-spektaklde Abaıdyń bala kezi, alǵashqy mahabbaty Toǵjanǵa ǵashyq bolýy, sondaı-aq Birjan salmen kezdesýi sıaqty aqynnyń ómirinen úzindiler kórsetiledi. Uly sazgerdiń ánderi men qara sózderine de basa nazar qoıylǵan. Qoıylymda «Aıttym sálem Qalamqas», «Kózimniń qarasy», «Jelsiz túnde jaryq aı» ánderi shyrqalyp, Qorqyt pen Qurmanǵazynyń kúıleri tartyldy.

«Bul jerde balanyń kózqarasymen, bala jańaǵy qıal-ǵajaıypqa enip ketken kezde jas Abaıdyń biz shabyttanǵan kezin kórsetemiz. Onyń Toǵjanǵa ǵashyq bolýy, onymen kezdesýi jáne oǵan án arnaýy. Bunyń barlyǵy rejıserden, menen shyqqan fantazıa. Odan keıin ájesi Zerege erkeleýi, ony qalaı jaqsy kóretindigi, ájesiniń nemeresine degen mahabbaty kórsetiledi», – dedi Ǵabıt Músirepov atyndaǵy balalar jáne jasóspirimder teatrynyń kórkemdik jetekshisi, jobanyń rejıseri Danıar Bazarqulov.