Búgin Aqtaý qalasynda hımıa-bıologıa baǵytynda bilim beretin Nazarbaev zıatkerlik mektebiniń ashylý rásimi ótti. Saltanatty sharaǵa Mańǵystaý oblysynyń ákimi Alık Aıdarbaev, Aqtaý qalasynyń ákimi Serikbaı Trumov, saıasat jáne qoǵam ókilderi, ustazdar, oqýshylar men ata-analar jáne BAQ ókilderi qatysty.
Nazarbaev Zıatkerlik mektepteriniń ashylýy Memleket basshysynyń bastamasymen qolǵa alynǵan «20 Zıatkerlik mektep» memlekettik baǵdarlamasynyń aıasynda júzege asqan bolatyn. Eń alǵash fızıka-matematıka baǵytynda bilim beretin Nazarbaev zıatkerlik mektebi 2009 jyly Astana qalasynda ashyldy. Búginde respýblıka boıynsha 19 zıatkerlik mektep jumys isteıdi.
Aqtaý qalasyndaǵy Nazarbaev Zıatkerlik mektebi 720 orynǵa arnalǵan. Ǵımaratta jańa oqý quraldarymen jabdyqtalǵan 54 oqý kabıneti, 24 laboratorıa ornalasqan. Mektepte hımıa-bıologıa, fızıka-matematıka, ıntegrasıa, tehnıkalyq modeldeý kabınetteri, nano-bıotehnolgogıa, robotehnıka laboratorıasy men aqparattyq bólme jumys isteıdi.
Sonymen qatar, mektep telestýdıasy oqýshylardyń shyǵarmashylyq jáne ǵylymı qabiletin arttyrýǵa arnalǵan. Ustazdardyń oqý prosesin júıelerimen, mýltımedıalyq kabınettermen, zamanaýı kompúterlik tehnıkamen, ınteraktıvti elektrondy taqtalarmen, jyldam ınternet júıesi jáne ınovasıalyq baǵdarlama quraldarymen qamtylǵan.
Zıatkerlik mektepte úsh zaldan turatyn kitaphana jumys jasaıdy. Alǵashqy oqý jylynda oqýshylar men ustazdarǵa 6-7 myń kitap qoljetimdi bolsa, kelesi jyly kitaphanadaǵy kitap qory 20 myń danaǵa deıin tolyǵady dep kútilýde. Kitaphanada qazaq, orys jáne aǵylshyn tilderinen basqa qytaı, fransýz, nemis tilindegi kitaptar bar.
Atalǵan mektep eki sport zalynan turatyn sporttyq-saýyqtyrý blogy bar. Oqý ǵımaraty janynda fýtbol, volleıbol, ártúrli jeńil atletıkamen aınalasýǵa arnalǵan alańdar, tenıs korty men balalar demalysy úshin arnaıy bólingen orny bar jańa sport kesheni ornalasqan.
Qazirgi tańda atalǵan mektepke 477 oqýshy Qazaqstan Respýblıkasynyń Birinshi Prezıdentiniń «Órken» bilim grantynyń ıegeri atanyp, olarǵa irikteý kezeńderinen ótken 80-nen astam muǵalim sabaq beretin bolady.
Derekkózi: Aqtaý qalasy ákiminiń resmı saıty
