«Qazaqstandaǵy árbir úshinshi «Altyn belgi» ıegeri — Ońtústik Qazaqstan oblysy mektepteriniń túlegi. Bul óte qýanyshty jaǵdaı. Munyń barlyǵy Ult Kóshbasshysy Nursultan Nazarbaevtyń dana ári salmaqty saıasatynyń jemisi», - dedi Bilim kúni merekesinde Shymkent qalasynda ornalasqan «hımıa-bıologıa baǵytyndaǵy Nazarbaev zıatkerlik mektebine» baryp, muǵalimder men oqýshylardy merekemen quttyqtaǵan OQO ákimi Beıbit Atamqulov.
«Oblysta 18 112 oqýshy UBT tapsyryp, olardyń ortasha kórsetkish 78,8 baldy qurady. Oǵan qosa árbir úshinshi «Altyn belgi» ıegeri bizdiń mektepterdiń túlegi», - dep atap ótti óńir basshysy.
Sondaı-aq, ońtústikqazaqstandyq oqýshylar 2015 jyly alǵash ret respýblıkalyq pán olımpıadasynyń qorytyndysyna sáıkes, 2 baǵyt boıynsha júldeli úshinshi oryndy ıelengeni de belgili boldy.
Oblys basshysy óz sózinde bıylǵy jańa oqý jylynda 70 myńnan astam oqýshy mektep tabaldyryǵyn alǵash ret attaǵaly otyrǵanyna toqtaldy. Bul respýblıkadaǵy eń joǵary kórsetkish. Elimizdegi eń joǵary týý kórsetkishi bizdiń oblysta tirkelip otyr. Turǵyndardyń ál-aýqaty jyldan jylǵa jaqsaryp kele jatqany da talassyz», - dedi B.Atamqulov.
OQO jańa oqý jylynda 49 jańa bilim berý mekemesi paıdalanýǵa berilse, sonyń 22-si búgin, 1 qyrkúıek kúni ashyldy.
Sondaı-aq, B.Atamqulov atqarylǵan jumystardyń nátıjesinde úsh aýysymdy mektepter sany 21-ge deıin qysqaratynyna nazar aýdardy. Al, 46 apatty jaǵdaıdaǵy mektepten bar-joǵy 17-si qalmaq. Oǵan qosa bıyl OQO-da 74 mektep kúrdeli jóndeýden, 675 mektep aǵymdaǵy jóndeýden ótkizildi. Jalpy, óńirdegi úsh aýysymdy jáne apatty jaǵdaıdaǵy mektepter problemasy 2016-2017 jyldary tolyǵymen sheshiledi dep josparlanýda.
Oblys basshysy Nazarbaev zıatkerlik mektebiniń synyptary men zerthanalaryn aralap, oqýshylarmen áńgimelesti.
