Búgin Ońtústik Qazaqstan oblysynyń ákimi Beıbit Atamqulovtyń tóraǵalyǵymen ótken májiliste óńirdegi bilim mekemeleriniń jańa oqý jylyna daıyndyǵy jáne mektep oqýshylaryn oqýlyqtarmen qamtý jaıy qaraldy. Jıynǵa basqarma basshylary men aýdan, qala ákimderi qatysyp, kún tártibine qoıylǵan másele boıynsha oblys ákiminiń orynbasary Erlan Aıtahanov baıandama jasady.
Bilim salasynda atqarylǵan jumystar jóninde habarlama jasaǵan E.Aıtahanov búgingi tańda óńirimizde mektepke deıingi uıymdardyń sany 1454 birlikke jetip, olarǵa 157780 bala qamtylǵandyǵyn atap ótti. Oblysymyz respýblıka kóleminde birinshi bolyp balabaqsha júıesin memlekettik-jekemenshik áriptestik sheńberinde keńeıtýdi qolǵa alǵandyǵyn málimdegen oblys ákiminiń orynbasary qazirdiń ózinde memlekettik-jekemenshik áriptestik negizinde 647 balabaqsha iske qosylyp, ol óńirimizdegi jalpy mektepke deıingi uıymdar úlesiniń 44,4 paıyzyn qurap otyrǵandyǵyn jetkizdi.
– Jalpy mektepke deıingi uıymdarǵa 3-6 jastaǵy balalardy qamtý kórsetkishi 78,3 paıyzǵa jetip, memlekettik baǵdarlamanyń jyldyq jospar artyǵymen oryndaldy, – dedi Erlan Qýanyshuly.
Byltyrǵy oqý jylynda 1022 mektepte 562621 oqýshy bilim alyp, UBT-ǵa mektep bitirýshilerdiń 69,8 paıyzy qatysqan. Oblystyń orta baly ótken jyldan 4,2 balǵa kóterilip, 78,7 baldy quraǵan. Al «Altyn belgige» 608 túlek ıe bolyp, ótken jylmen salystyrǵanda 172 túlekke artqan. – Bul respýblıkadaǵy «Altyn belgi» ıegerleriniń 30%-yn quraıdy, – dep atap ótti oblys ákiminiń orynbasary.
Budan keıin bilim berý uıymdarynyń qurylysy men jóndeý jumystary baıandaldy. Bıyl oblysta respýblıkalyq jáne oblystyq búdjet esebinen 104 bilim nysanynyń qurylysy qolǵa alynǵan. Onyń ishinde jyl aıaǵyna deıin 67 jańa bilim nysanynyń qurylysyn aıaqtaý josparlanyp, qazirge deıin 37-si paıdalanýǵa berilgen. Sonymen qatar, jyl basynan beri ǵımaraty apatty dep tanylǵan mektepterge jańa 19 mektep ǵımaraty salynǵan. Jyl sońyna deıin osy sanattaǵy taǵy 10 mekteptiń qurylysyn aıaqtaý josparda bar. Qalǵan 17 mekteptiń qurylysyn aldaǵy eki jylda aıaqtaý kózdelgen. Sondaı-aq, 100 bilim nysandarynda júrip jatqan kúrdeli, 697 bilim mekemesindegi aǵymdaǵy jóndeý jumystary taıaý arada aıaqtalady.
Bilim mekemeleriniń qysqy jylytý maýsymyna daıyndyǵy jóninde aqpar bergen oblys ákiminiń orynbasary 1479 bilim beretin mekemelerdiń jylý júıelerine qysymdaý-syǵymdaý jumystary 94 paıyzǵa atqarylǵandyǵyn, qajetti qatty otynnyń 72 paıyzy, suıyq otynnyń 80 paıyzy tasymaldanǵandyǵyn, tabıǵı gazben jylytylatyn 355 bilim mekemeleri gaz tasymaldaýshy mekemelermen kelisimsharttar túzgendigin tilge tıek etti.
QR Bilim jáne ǵylym mınıstrligi ázirlegen kestege sáıkes oblystaǵy mektepter 2015 jyly 4, 5, 6, 11-synyptarǵa arnalǵan oqýlyqtar men oqý-ádistemelik keshenderine jáne 3-synyptyń aǵylshyn tili men 7-synyptyń ınformatıka páni oqýlyqtarymen qamtylýy tıis. Osy oraıda aýdan, qala ákimdikteri 12 baspamen jasaǵan kelisimsharttar negizinde kelip túsken oqýlyqtardy mektepterge taratý jumystaryn júrgizýde. Bul baǵyttaǵy mejelengen jumystar jańa oqý jyly bastalǵanǵa deıin jalǵasyp, bilim mekemeleri qajetti oqýlyqtarmen tolyq qamtylmaq.
Májilisti qorytyndylaǵan oblys ákimi Beıbit Atamqulov jańa oqý jylyna daıyndyq kún tártibindegi eń ózekti másele ekendigine erekshe toqtalyp, aýdan, qala ákimderi men basqarma basshylaryna bilim berý uıymdaryndaǵy qurylys, jóndeý jumystarynyń óz merziminde atqarylýyn baqylap, sapasyn qadaǵalaýdy jáne qurylysy josparlanǵan nysandarǵa jer bólýdi tezdetý, bilim berý uıymdary aldynda oqýshylar qaýipsizidigin qamtamasyz etý úshin arnaıy jol belgilerin ornatý jaıynda birqatar naqtyly mindetter júktedi.
OQO ákimi apparatynyń
baspasóz qyzmeti
