Jańa oqý jylyna sanaýly kúnder qaldy. Oblys ákimi B.Atamqulovtyń basshylyǵymen 13 tamyz kúni ótken májiliste oblystyq ákimdik tarapynan aýdan, qala basshylaryna aldaǵy jańa oqý jylyna qatysty daıyndyqty pysyqtaý úshin birqatar tapsyrmalar berilip, atqarylatyn jumystardyń aýqymy anyqtalǵan bolatyn. Atalǵan májiliste bilim salasyna jetekshilik jasaıtyn jaýaptylarǵa naqtyly mindetter júkteldi. Osyǵan oraı Ońtústik Qazaqstan oblysy ákiminiń orynbasary Erlan Aıtahanovtyń tóraǵalyǵymen arnaıy selektorlyq májilis ótti. Jıynǵa bilim, jastar saıasaty jáne tilderdi damytý basqarmasynyń qyzmetkerleri men oblys ákimi apparatynyń mamandary jáne aýdan, qala ákimderiniń salaǵa jetekshilik etetin orynbasarlary, bilim bóliminiń basshylary men jaýapty mamandary qatysty. Maqsat oblys ákimi bergen tapsyrmalarynyń oryndalý barysyn taǵyda pysyqtaý.
Kún tártibinde oqýshylardy oqýlyqtarmen qamtamasyz etý, bilim nysandaryndaǵy aǵymdaǵy jáne kúrdeli jóndeý jumystarynyń barysy, shalǵaıdaǵy eldi mekende turatyn oqýshylardy mektepterge tasymaldaý, aldaǵy jylý berý maýsymyna bilim mekemeleriniń daıyndyǵy syndy ózekti máseleler qaralyp, saralandy.
Aldymen Sozaq aýdany ákiminiń orynbasary Sáýle Edenbaeva 1-synypqa qajetti ádistemelik quraldardan ózge oqýlyqtarmen qamtý kórsetkishiniń 100 paıyzǵa jetkenin málimdep, bul baǵyttaǵy jumystar 21 tamyzda tolyqtaı aıaqtalatynyn baıandady. Búginge deıin teriskeıdegi bilim berý mekemelerine qajetti qatty otynnyń 57 paıyzy jetkizilgen, oqýshylardy mektepterge tasymaldaý úshin qaýly qabyldanyp, qarjy qaralǵan.
Al, Ordabasy aýdany 17 tamyzǵa deıin 64 mektepke qajetti oqýlyqtardyń 78 paıyzyn alyp úlgergen. Bul jumystardyń 25 tamyzǵa deıin tolyq aıaqtalatynyn habarlaǵan aýdan ákiminiń orynbasary Áldibek Sádirmek 11 mektepke 990 oqýshyny tasymaldaý úshin kelisimsharttardyń túzilgenin aıtty. Óz kezeginde Ordabasydaǵy Qyzylseńgir aýylynda turatyn 32 oqýshyny mektepke tasymaldaý jaıyna erekshe toqtalǵan Erlan Qýanyshuly osy baǵytta atqarylǵan jumystarǵa tereńinen taldaý jasap, nátıjesin jazbasha baıandaýdy júktedi.
Kentaý qalalyq bilim bólimi oqýlyqtarmen qamtý úshin 8 baspamen ózara kelisimshart jasasqan. Oqýshylardy tasymaldaýda ózekti másele joq. Jylý maýsymyna daıyndyq jumystary josparǵa saı júrýde. 44 bilim nysanynyń 32-si ortalyq jylý júıelerine qosylǵan. Túrkistandaǵy qoımadaǵy qatty otyn Kentaýdaǵy bilim uıalaryna jetkizilýde.
Báıdibek aýdanyndaǵy bilim mekemeleri aldaǵy jylý maýsymyna saqadaı saı. Jylý júıelerine tıisti syǵymdaý jumystary júrgizilip, qajetti otyn alynǵan. Al, Túlkibasta jetkizilgen oqýlyqtardy taratý jumystary qarqyndy júrýde. Aýdanda qatty otyn máselesi tolyq sheshilgen.
Saryaǵashtaǵy 142 bilim mekemesi oqýshylardy qabyldaýǵa daıyn. Qajetti oqýlyqtar baspalardan alynyp, jaýapty mamandardyń jolbastaýymen jolda kele jatyr. 6 mektepte júrgizilgen kúrdeli jóndeý jumystary aıaqtalyp, búginde memlekettik qabyldaý jumystary júrýde. Kómir mektepterge jetkizilip berilgen. Oqýshylardy tasymaldaýǵa qazynadan qarjy qarastyrylǵan.
Saıramda tasymaldaýdy qajet etetin oqýshylardy mektepke aparyp-ákelý maqsatynda jeke kompanıamen kelisimshart túzilgen. Aýdanǵa jetkizilgen oqýlyqtar men ádistemelik quraldardy mektepterge taratý jumystary atqarylýda. 84 bilim nysanyn jylytý úshin suıyq jáne qatty otyn alynǵan. Aýdanda kúrdeli jóndelip jatqan úsh mekteptiń ekeýindegi jóndeý jumystary josparǵa saı keler jyly jalǵasady. Al bir mekteptegi jóndeý tolyǵymen bitken.
Tóle bı aýdanyndaǵy bilim oshaqtaryna qatty otyndy tasymaldaý jumystary 20 tamyzda aıaqtalady. Búginde qajetti otynnyń 87 paıyzy mektepterge jetkizilgen. Otyrar aýdany búginge deıin oqýlyqtardyń 64,3 paıyzyn alǵan. Jaýapty mamandar 7 baspamen birlese jumys jasaýda. 6 bilim berý nysany kúrdeli jóndelgen búginde memlekettik qabyldaý júrip jatyr. Jalpy oqýlyqtar máselesi men bilim nysandarynyń aldaǵy oqý jylyna daıyndyǵy Otyrarda keler seısenbide óz sheshimin tappaq. Temirjolshylar qalasy atanǵan Arystaǵy aldaǵy jańa oqý jylyna daıyndyq sharalaryn osy bir apta ishinde aıaqtaý josparlanyp otyr.
Túrkistan qalasy men Maqtaral, Qazyǵurt aýdandaryndaǵy atqarylǵan sharalardy baıandaǵan jaýaptylar jospar boıynsha jumystardyń atqarylyp jatqanyn habarlady. Erlan Aıtahanov atalǵan qala, aýdandardaǵy oqýshylar tasymaly týraly oblystyq bilim, jastar saıasaty jáne tilderdi damytý basqarmasymen birlesip, tıanaqty taldaý jasap, nátıjesin málimdeýdi júktedi. Shardaradaǵy jaýaptylardyń jaıbasarlyǵyn synǵa alǵan oblys ákiminiń orynbasary baspalar tarapynan ázirlengen 58 myńnan astam oqýlyqty shuǵyl arada aýdanǵa jetkizý úshin bilim bólimi meńgerýshisin shuǵyl Almatyǵa attandyrýdy aýdan ákiminiń orynbasary Baqtybaı Álipovke tapsyrdy.
Selektorlyq májilisti qorytyndylaǵan Erlan Qýanyshuly aldaǵy jańa oqý jylyna daıyndyq barysy oblys ákiminiń jiti baqylaýynda turǵanyn habarlap, barlyq jumystardy 25 tamyzda aıaqtaýdy mindettedi. Baspalardan shyqqan oqýlyqtardy shuǵyl túrde óńirge jetkizý, mektepterge taratýǵa qatysty alda atqarar sharalardy aıqyndap, jaýapty tulǵalarǵa naqtyly tapsyrmalar júktedi. Sondaı-aq, aýdan, qalalardyń oqý jylyna daıyndyǵy týraly kúndelikti taldamalyq aqpar ázirlep, usynýdy mindettedi.
OQO ákimi apparatynyń
baspasóz qyzmeti
