Halyqaralyq qatynastar, qorǵanys jáne qaýipsizdik komıtetiniń tóraǵasy, senator Muhtar Qul-Muhammed Reseı dýmasynyń depýtaty jáne "Bolshaıa ıgra" baǵdarlamasynyń júrgizýshisi Vácheslav Nıkonovtyń  "Qazaqstan aýmaǵy – Reseı tarapynan jasalǵan syı" degen pikirine jaýap berdi, dep habarlady Qazaqstan parlament senatynyń baspasóz qyzmeti

Óz pikirinde senator qazaq halqynyń tarıhy tym tereńde jatqanyn, onyń ishinde ata-babalarymyzdyń ejelden Soltústik Qazaqstandy qonys etkenin aıtqan.

– Erte zamandardan beri qaraı atalǵan jerlerdi qazaq taıpalary jaılaǵany – basy ashyq aqıqat. Dál osy jerde bizdiń zamanymyzǵa deıin úshinshi myńjyldyqta ómir súrgen ataqty botaı mádenıetiniń qonystary tabyldy. Botaılyqtar jabaıy jylqylardy qolǵa úıretken, jylqy sharýashylyǵymen jáne ártúrli kásippen aınalysqan. Ǵasyrlar men myńjyldyqtar boıy osy dalada bizdiń tikeleı babalarymyz – saqtar, ǵundar, túrkiler, qypshaqtar men qazaqtar qurǵan memleketter birin-biri almastyryp otyrdy, – deıdi Muhtar Qul-Muhammed.

Sonymen qatar, senat depýtaty qazaq dalasynda Túrki qaǵanaty, Deshti-Qypshaq, orta ǵasyrdaǵy dańqty memleket – Altyn Orda, Qazaq handyǵy týyn tikkenin jáne búgingi Qazaqstan osy elderdiń zańdy jalǵasy ekenin dáleldi jetkizgen.

– Altyn Ordanyń negizin qalaǵan Joshy han – Kereı men Jánibekten Abylaıǵa deıingi barlyq qazaq handarynyń atasy. Joshy hannyń mazary Ulytaýda, Ortalyq Qazaqstannyń aýmaǵynda ornalasqan. Altyn Orda ydyraǵannan keıin 1465 jyly Qazaq handyǵy quryldy. Onyń 550-jyldyǵyn 2015 jyly Qazaqstan memlekettik deńgeıde atap ótti. Mine, dál osy handyq Reseımen dostyq qarym-qatynas ornatqan. Bul týraly reseılik ǵalymdar jan-jaqty zertteýler jasaǵan, – dedi senator.

Senator búginde Qazaqstan men Reseıdiń arasynda úlgili baılanys ornaǵanyn da atap ótken.

– Qazirgi tańda Qazaqstan men Reseıdi strategıalyq seriktestik, máńgilik dostyq týraly kelisim jáne odaqtastyq, jeti jarym myń shaqyrymnan astam shekara, eń bastysy – azamattarymyz ben halyqtarymyzdy kózge kórinbes berik jarasym baılanystyryp tur, – dedi senator.

Sondyqtan, táýelsizdik kúniniń qarsańynda aıtylǵan Vácheslav Nıkonovtyń sózi halqymyzdyń ashý-yzasyn týdyrǵanyn aıtty.

– Bul – saıası jaýapsyzdyq qana emes, berik dostyq qarym-qatynas ornata bilgen mıllıondaǵan qazaq pen orystyń tarıhı tanymyn qorlaý. Men úshin de jáne mıllıondaǵan qazaqstandyq úshin de orys pen qazaq halqy arasyndaǵy dostyqty saqtaýdyń mańyzdy ekeni aıqyn. Ásirese, aıyptaýlar men arandatýshylyq málimdemelerge jol berýge bolmaıdy, – dedi Muhtar Qul-Muhammed.