Qazaqstan Syrtqy ister mınıstrligi "Qazaqstan terıtorıasy Reseı tarapynan jasalǵan úlken syılyq" degen málimdeme jasaǵan Reseı memlekettik dýmasynyń depýtaty Vácheslav Nıkonovqa narazylyq nota jarıalandy.

"Qazaqstan Respýblıkasynyń Syrtqy ister mınıstrligine Reseı Federasıasynyń Ýaqytsha senimdi ókili Aleksandr Komarov shaqyryldy.

Kezdesý barysynda Syrtqy ister mınıstriniń orynbasary Marat Syzdyqov Reseı Federasıasy Memlekettik Dýmasynyń Bilim jáne ǵylym jónindegi komıtetiniń tóraǵasy Vácheslav Nıkonovtyń Birinshi arnadaǵy «Qazaqstannyń terıtorıasy - Reseı tarapynan úlken syılyq» degen sózine qatysty túsinispeýshilik bildirdi.

Keıbir reseılik saıasatkerlerdiń Qazaqstanǵa qatysty arandatýshylyq áreketteriniń jıilep ketýi memleketterimiz arasyndaǵy odaqtastyq qatynastarǵa aıtarlyqtaı nuqsan keltiretini atap ótildi.

QR SİM Reseı tarapynyń mundaı málimdemelerge tıisti baǵa berýin kútýde jáne Reseı Federasıasynyń memleket qaıratkerlerinen mundaı málimdemelerge jol bermeý úshin sharalar qabyldaýǵa shaqyrady.

Reseılik dıplomatqa QR SİM ustanymy kórsetilgen nota tabystaldy" delingen mınıstrligi taratqan aqparattyq habarlamada.