Búgin Astana ýaqyty boıynsha saǵat 10.38-de Baıqońyr ǵarysh aılaǵynan "Soıýz-FG" tasymaldaýshy zymyrany "Soıýz TMA-18M" ǵarysh kemesimen jáne jańa ekıpajymen ushty. Ekıpajda qazaqstandyq ǵaryshker Aıdyn Aıymbetov, reseılik Sergeı Volkov jáne Eýropa ǵarysh agenttiginiń astronavty Andreas Mogenson bar. Bul týraly «Qamshy» portaly Tengrinews.tv-ǵa silteme jasaı otyryp habarlaıdy. Toqtar Áýbákirov pen Talǵat Musabaevtardan keıin tuńǵysh ǵaryshqa attanǵan qazaq ǵaryshkeri Aıdyn Aıymbetov bul saparda ekinshi bortınjener retinde attandy.
Aıta keteıik, «Soıýz TMA-18M» kemesiniń negizgi ekıpajynyń ushý qarsańyndaǵy kún óte qarbalas bolǵan. Reseı Federasıasy ǵarysh agenttiginiń basshysy Aleksandr Ivanov myrza bastaǵan memlekettik komısıa Halyqaralyq ǵarysh stansıasyna ushatyn ekıpajdardy sheshýshi baqylaýdan ótkizgennen keıin túpkilikti sheshim qabyldaǵan.
Ushyrý aldyndaǵy baspasóz máslıhatynda belgili bolǵandaı, komandanyń eki múshesi ǵaryshqa alǵash ret ushqaly otyr.
Keme komandıri Rosǵarysh ǵaryshkeri Sergeı Volkov bul joly ǵaryshqa úshinshi ret sapar shekkeli tur. Ol óz áriptesteriniń ázirlik deńgeıin joǵary baǵalady jáne «Gagarın alańynan» ushatyn 500-shi mereıtoılyq ushyrý oıdaǵydaı ótetinine senimin bildirdi.
Sergeı Volkov «jańa» ǵaryshkerlerdi alyp ushýmen qatar, kelesi jyldyń naýryz aıynda keme komandıri retinde bir jyl boıy stansıada jumys jasap jatqan Mıhaıl Kornıenko men Skott Kellıdi Jerge alyp qaıtpaq.
Sergeı Volko HǴS bortyndaǵy úlken ǵylymı baǵdarlama jóninde aıta kelip, onyń eýropalyq, qazaqstandyq jáne reseılik ǵylymı baǵdarlamalar boıynsha júrgiziletinin atap ótti.
Eýropalyq ǵarysh agenttiginiń astronavty Andreas Mogensen baspasóz máslıhaty kezinde ǵaryshqa ushýdy kópten beri armandaǵanyn jáne Danıanyń alǵashqy astronavty bolatynyn maqtan etetinin aıtty. Bul týraly Qazaqparat jazǵan bolatyn.
Qazǵarysh ǵaryshkeri Aıdyn Aıymbetov ǵaryshqa kishkentaı qyzy Daıana tikken oıynshyqty ózimen birge ala ketetinin aıtty. Sonymen birge, qazaqstandyq ǵaryshker QR memlekettik rámizderin alyp ushty.
Ushý aldyndaǵy kúni ekıpaj múshelerin «Iýbıleınyı» áýejaıynda QR vıse-premeri B.Saparbaev, «Baıqońyr» ǵarysh kesheniniń basshylary, Qazǵarysh basshysy Talǵat Musabaev, Qyzylorda oblysynyń ákimi Qyrymbek Kósherbaev qarsy alady.
«Sizdiń ákeńiz Aleksandr Volkov bizdiń alǵashqy qazaq ǵaryshkeri Toqtar Áýbákirov ushqan ekıpajdyń komandıri bolǵan edi, endi Siz osy estafetany jalǵastyrylyp, bizdiń Aıdyn Aıymbetov ushatyn ekıpajdyń komandıri bolyp otyrsyz», - dedi vıse-premer Sergeı Volkovqa qarata aıtqan sózinde.
Sondaı-aq, Berdibek Saparbaev Qazaq handyǵynyń 550 jyldyǵy qurmetine ekıpaj múshelerine tarıhı mereıtoılyq medaldardy tapsyrdy.
Álemdik kosmonavtıkanyń Otanyna aınalǵan qazaq jeri óziniń uldarynyń ǵaryshtyq mısıasyn oıdaǵydaı oryndap oralýyn asyǵa kútetin bolady.
Nurzat Toǵjan
