Jaqynda Aýǵanstannyń birinshi vıse-prezıdenti, general Abdýl Rashıd Dýstým Reseı Federasıasynan  aýǵan qaýipsizdik kúshterine áýe jáne áskerı tehnıka berýin suraǵan. Bul týraly «Qamshy» portaly Qazaqparatqa silteme jasaı otyryp habarlaıdy.

Soltústik Aýǵanstannyń soltústigindegi  uzaq ýaqytqa sozylǵan áskerı is-qımyldarǵa qatysyp, Kabýlǵa endi oralǵan vıse-premer Abdýl Rashıd Dýstam myrza dúısenbi kúni keshke, Kabýldaǵy baspasóz konferensıasynda sóz sóılegen sózinde  «Reseı basshylyǵynyń bizdiń ótinishimizge úndemeı qalmaýy tıis» degen.

«Bizdiń qaýipsizdik kúshterimiz ushaq, tikushaq jáne basqa da qarýly tehnıkalarǵa muqtaj. Kóp qarýymyz Reseıden ákelingen. Olar (Reseı) bizdiń qaýipsizdik kúshterimizge kómektesýi kerek», - dedi Aýǵanstannyń birinshi vıse-prezıdenti.

Budan basqa, A.Dýstým «Islam memleketi» uıymy máselesin sóz etip, radıkaldardyń tek Aýǵanstanǵa emes, búkil aımaqqa qaýip tóndirip otyrǵanyn aıtqan. Onyń aıtýynsha, Aýǵanstan - IM-niń josparyna kirip otyrǵan jalǵyz el emes. «Eger olardyń josparlaryna tek Aýǵanstan kirse, «Islam memleketiniń» qatarynda ózbekter men sheshender ne istep júr. «Daısh» (IM-niń arabsha ataýy) Kavkaz, Reseı jáne Ortalyq Azıany basyp alýy múmkin. Sırıa men Iraktyń qalaı qırap jatqanyn qarańyz, olar Ortalyq Azıanyń qaýipsizdigin de turaqsyzdandyrǵysy kelip otyr», - dep atap ótti general A.Dýstým.

Aýǵan kúshteriniń eldiń soltústigindegi arnaıy is-qımyldaryn sóz ete otyryp, A.Dýstým áskerlerdiń Faráb jáne Sar-e-Pýl provınsıalaryn tazartyp úlgerip, endi Kabýldyń atalǵan aýdandarda turaqtylyqty qamtamasyz etip otyratynyn atap ótti.

Buǵan deıin aǵymdaǵy jyldyń tamyz aıynda general Abdýl Rashıd Dýstým soltústiktegi Faráb provınsıasynda ekstremısterge qarsy arnaıy is-qımyldardy basqarǵan. Aýǵan BAQ-tary AIM-niń birinshi vıse-prezıdentiniń ómirine eki ret qastandyq jasalyp, «Talıban» toby sodyrlarynyń tosqaýyly uıymdastyrylǵanyn habarlady.