Qazaqstan 2013 jyly qol qoıǵan resmı qujatty Beıjiń aǵymdaǵy jyldyń 1-shi  shildesinde maquldaǵan bolatyn. Atalǵan kelisim boıynsha Qytaı túrmesindegi qazaqstandyq azamattar jazasyn óz elinde óteı alady. Bul týraly «Qamshy» portaly  nur.kz-ke silteme jasaı otyryp habarlaıdy.

Biraq  Qazaqstanǵa aýystyrylǵan sottalýshylar arasynda 21 jastaǵy stýdent Aqjarqyn Turlybaı joq dep jazady 7news.kz.

Aqjarqyn Turlybaı esirtki tasymaldaǵany úshin Qytaı zańyna sáıkes ómir boıyna bas bostandyǵynan aıyrylǵan bolatyn. Ol ótken jyldyń naýryzynda Gýanchjoý áýejaıynda ustaldy.

Bas prokýratýranyń baspasóz hatshysy Ernur Ýálıdiń aıtýynsha, Aqjarqyn áli Qazaqstanǵa aýysý týraly ótinish jasaı almaıdy. Óıtkeni, atalǵan qujat tolyǵymen rettelip, kúshine engenge deıin biraz ýaqyt kerek. Prokýratýra ókiliniń aıtýynsha, sottalýshylar Qazaqstanǵa kelgen soń, týra Qytaıda alǵan jazalaryn óteıtin bolady.

Al Aqjarqyn Turlybaıdyń advokaty Suńqar Nurmaǵambetov Qazaqstan prezıdentiniń Qytaıǵa resmı sapary barysynda qol qoıylǵan qujattyń úlken úmit syılap otyrǵanyn jazdy.

«Men eki el basshylarynyń sheshimin quptaımyn. Bul Qytaıda sottalǵan Qazaqstan azamattarynyń elge ekstradasıalanýyna septigin tıgizedi», – degen quqyq qorǵaýshy.