Jaqynda «Shebsklad» saıajaıynda jaldap turyp jatqan páterleri súrilgen soń, Aqorda aldyna narazylyq sharasyn ótkizgen kóp balaly ananyń 6 balasy mektepke barmaı qaldy. Bul týraly qazaqstandyq BAQ jazǵan bolatyn . Bıyl shildede baspanasy joqtyǵyna nalyp, Aqorda aldynda narazylyq tanytqan 8 balaly ana Jeńisgúl Ermuqametqyzynyń 6 balasy – Aıdıdar, Ulaǵat, Muhammet, Saıypqyran, Merýert pen Almas 1 qyrkúıekte mektepke barmaı úıde otyr. Bul týraly «Qamshy» portaly Azattyq saıtyna silteme jasaı otyryp habarlaıdy.
2004 jyly Qytaıdan atajurtqa qonys aýdarǵan etnıkalyq qazaqtardyń balalary byltyr Astana qalasyndaǵy 57-mektepte bilim alǵan bolatyn. 8 balanyń anasy Jeńisgúl Ermuqametqyzy men Muhamedı Shánniń «Shebsklad» saıajaıynda jaldap turyp jatqan páterleri súrilgen soń, kóp balaly otbasy Aqordanyń aldynda narazylyq sharasyn uıymdastyryp, ýájderin Qazaqstan Prezıdentiniń ózine tikeleı jetkizýge talpynǵan. Alaıda Astana qalalyq quqyq qorǵaý ókilderi olardy Aqordaǵa kirgizbeı, polısıa kúshtep alyp ketken. Osy oqıǵadan keıin úısiz-kúısiz dalada qalǵan qandastarǵa Astananyń áýejaıy qasyndaǵy «Prıgrodnyı» aýylynyń áleýmettik jataqhanysynan 17 sharshy metrlik bólmeni ýaqytsha turýǵa bergen.
Jeńisgúl Ermuqametqyzy, 8 balanyń anasy, 3-toptaǵy múgedek:
– Bizdi bul jerge ýaqytsha ornalastyrdy. «Eki bólmeli jataqhana beriledi, ol bosaǵansha osynda tura turyńdar» dedi. Kórip tursyńdar, munda jaryq joq. Birinshi qabat bolǵan soń ba, sýyq. Qansha kún turatynymyzdy bilmeımiz. Páter máselesin sheship almaı mektepke qalaı baramyz? Bıylǵy oqý jyly bastalar shaqta 57-mektep muǵalimderi habarlasyp, jaǵdaıymyzdy suraǵan. Biraq ol mektepke qatynaıtyn joldyń alystyǵyna baılanysty balalar mektepke bara almaıtyndyqtaryn aıttym.
Baǵlan Smataeva, Astana qalalyq bilim basqarmasy basshysynyń orynbasary:
– Qala turǵyndary Muqamedı Shán men Jeńisgúl Ermuqametqyzy balalaryn mektepke ornalastyrý jóninde kómek surap kelmegen. Eger kómek suraǵan jaǵdaıda tıisti kómek kórsetiledi.
Bundaı jaýapty Astana qalalyq bilim basqarmasynyń basshysy «Azattyqa» jibergen.
Lázzat Ábýeva, Astana qalasynyń jumyspen qamtý jáne áleýmettik baǵdarlamalar basqarmasy basshysy:
– Ol otbasy dalada qalmaıdy dep aıtqanym ras. Ol kisiler bizdiń basqarmadan járdemaqy jáne basqalaı da kómek alyp jatyr. Al páter, jataqhana máselesin basqa basqarma, turǵynúı basqarmasy sheshedi. Olar sonda ózderi habarlasýlary tıis.
Muhamedı Shán men Jeńisgúl Ermuqametqyzynyń otbasy 2004 jyly SHQO-ǵa qonys aýdaryp kelip, sol jerde azamattyq alǵan. Balalarynyń úlkeni 17 jasta bolsa, kishisi 3 jasta. Joǵarydaǵy 8 balanyń altaýy Qazaqstanda týǵan. Áýelgi kóship kelgen aýdannan jumys taba almaǵandyqtan «oralman zańy» boıynsha memleketten berilgen úılerin satyp, Astanaǵa kóship kelgen. Alaıda munda da olardyń jaǵdaılary kelmeı otyr. Olar bastarynda buryn baspana bolǵandyqtan zańdaǵy 5 jyldyq shekteýdiń kesirinen páter kezegine tura almaıtyny taǵy bar.
Aıta keteıik, erli-zaıyptylardyń ekeýi de densaýlyqtaryna baılanysty eńbekke jaramsyz bolyp tabylady. Muhamedı Shán qulaǵy estimeıtindikten – 2- toptaǵy múgedek bolsa, segizinshi balasyn bosanǵannan keıin densaýlyǵy nasharlaǵan Jeńisgúl Ermuqametqyzy basyna ota jasatqan – 3-toptaǵy múgedek. Otbasynyń aılyq tabysy – 60 myń teńge. Ár balaǵa memleketten beriletin járdemaqy, múgedektikke jáne «Altyn alqa» ıegerine beriletin azyn-aýlaq qarajat otbasynyń negizgi kiris kózi bolyp otyr.
Nurgeldi Ábdiǵanıuly
