Mysyrlyq mıllıarder Nagıb Savırıs Italıa men Grekıanyń bılik basshylarynan bosqyndarǵa arnap bir araldy satyp alǵysy keletinin aıtty. Bul týraly ol Twitter jelisindegi paraqshasynda jazǵan.
Al batystyń buqaralyq aqparat quraldary Savırıstiń baılyǵy 3,1 mıllıard dollarǵa baǵalanǵanyn jáne Savırıstiń Jerorta teńizinde 10-100 mıllıon dollar aralyǵynda bir araldy satyp alýǵa múmkindigi bar ekenin jazady. Bul týraly «Qamshy» portaly Tengrinews.kz-ke silteme jasaı otyryp habarlaıdy.
"Grekıa nemese Italıa, óz araldaryńyzdyń birin satyńyzdarshy. Men ony táýelsiz etip jarıalap, bosqyndardy qabyldaımyn, jumyspen qamtımyn. Onda olar ózderiniń jańa otanyn salady", - dep jazdy Savırıs.
2015 jyldyń basynan beri Eýroodaqqa 340 myńnan asa bosqyn aýyp kelgen. Buǵan deıin Eýropalyq odaq odaqqa múshe elderdiń árqaısysyna Grekıa men Italıaǵa kelip úlgergen bosqyndardy 40 myńnan úlestirýge sheshim qabyldaǵan bolatyn. Onyń ústine qosymsha 20 myń bosqyndy úshinshi elderden ákelýge múmkindik týǵan.
Aıta keteıik, sırıalyq úsh jasar Aılan Kýrdıdiń ólimi bosqyndardyń ómirine búkil álemniń nazaryn aýdarǵan . Balanyń jaǵalaýǵa shyǵyp qalǵan jansyz denesiniń sýretterin kórgender Jelige balanyń qurmetine arnap salǵan sýretterin jarıalaı bastady.
Sırıalyq búldirshinniń qazasynan keıin, bosqyndardyń máselesi Eýroodaq kóshbasshylaryn ońtaılandyrýǵa kóshken. Financial Times málimetinshe, Brússel EO-ǵa múshe memleketter qabyldanyp jatqan bosqyndardyń sanyn tórt ese kóbeıtedi. Fransıa bıligi bolsa óz kezeginde Brússeldiń usynysyn qabyl alatynyn málimdep, taıaý kúnderi bul máseleni Germanıamen talqylaıtynyn jetkizdi. Ulybrıtanıa premer-mınıstri Devıd Kemeron bosqyndardyń sanyn kóbeıtýge daıyn ekenin habarlady.
Al Eýrokomıssıanyń prezıdenti Jan-Klod Iýnker kelesi aptada EO-ǵa múshe elderdi Grekıadan, Italıadan jáne Vengrıadan 160 myń bosqyndy qabyldaýǵa shaqyrǵaly jatyr. Al osydan eki apta buryn tek 40 myń adam týraly sóz qozǵalǵan edi.
