Prezıdent Qasym-Jomart Toqaev monıtorıń agenttiginiń tóraǵasy Janat Elımanovty qabyldady. Bul týraly Aqorda saıty habarlady.

Saıt málimetinshe, monıtorıń agenttiginiń tóraǵasy Toqaevqa kóleńkeli ekonomıkaǵa qarsy is-qımyldardy kúsheıtý jóninde bergen tapsyrmalarynyń oryndalý barysy týraly esep bergen.

Janat Elımanovtyń aıtýynsha, jyl basynan beri segiz uıymdasqan qylmystyq toptyń joly kesilgen, onyń ekeýi transulttyq top. Sondaı-aq ol búdjet qarjysyn jymqyrý derekteri boıynsha 14 mıllıard teńge kóleminde shyǵyn keltirgen 125 qylmystyq is qozǵalǵanyn jetkizdi. 

Prezıdentke agenttiktiń qarjy pıramıdalarynyń jolyn kesý baǵytynda atqaryp jatqan jumystary týraly baıandaldy. Vedomstvo basshysynyń aıtýynsha, búgingi tańda kúmándi is-áreketter boıynsha 21 materıal quqyq qorǵaý organdaryna joldanǵan. 

Budan bólek Janat Elımanov memleket basshysyna kásipkerlerdiń qylmystyq qýdalaýǵa túsýine  jol bermeý úshin qabyldanyp jatqan sharalar jóninde málimet berdi. Ol 2020 jyldyń qorytyndysy boıynsha tirkelgen ekonomıkalyq qylmystardyń sany ótken jyldarmen salystyrǵanda alty esege azaıǵanyn aıtty. Qylmystyq isterdi tekserý boıynsha kásipkerlerdi tergeýge shaqyrýlardyń sany eki esege, al tergep-tekserý merzimi 40 paıyzǵa qysqarǵan.

Qasym-Jomart Toqaev bıznesin adal júrgizip otyrǵan kásipkerlerdiń qylmystyq qýdalaýǵa túsýine jol bermeý jóninde júıeli sharalar qabyldaý qajettigine nazar aýdardy. 

Kezdesý sońynda prezıdent qarjylyq monıtorıń agenttiginiń tóraǵasyna birqatar naqty tapsyrma berdi.