Aqtaý qalasyndaǵy Nazarbaev Zıatkerlik mektebiniń bıologıa páni muǵalimi men 9-synyp oqýshylary Almaz Nurjanov pen Alına Chernákovanyń «Mańǵystaýdaǵy ekstraarıdti tabıǵı-klımatty jaǵdaıda qarapaıym anar ósirý» ǵylymı jobasy avtorlyq kýálikke ıe boldy.

Zertteý jobasynyń basty maqsaty - shóldi Mańǵystaý topyraǵyna otyrǵyzylǵan qarapaıym anardyń túrli qospalar men tyńaıtqyshtarǵa áserin, ósý kezeńderine synaq júrgizý. Eksperımentter men baqylaýdyń nátıjesinde joba avtorlary Mańǵystaý topyraǵy men aýa-raıy anardyń ósýine múmkindik beretindigin anyqtaǵan. Osylaısha oqýshylar óńirdegi aýyl shaýrashylyǵynyń damýyna úles qosqysy kelgen.

Alına men Almaz anar tuqymdaryn mektep jylyjaıyna otyrǵyzyp kórgen. Keıin bir jyl boıy ósimdiktiń morfologıalyq belgilerine fenologıkalyq baqylaý júrgizip, onyń ósý jyldamdyǵyna jáne tyńaıtqyshtardy qosý barysyndaǵy reaksıany saraptaǵan. Barlyq saraptamany talqyǵa sala kelip, nátıje shyǵarǵan.

Bul zertteý jumysynyń tájirıbede ózektiligi óte joǵary dep esepteımiz. Oqýshylar aldaǵy ýaqytta otyrǵyzǵan aǵashtaryn baqylap, olarǵa kútim jasaýdyń agrotehnıkalyq joldaryn meńgerip, Mańǵystaý oblysyndaǵy fermerlerge anar otyrǵyzyp kórýdi usynǵylary keledi, - dedi joba jetekshisi Gúljan Núsipjanova.

Jas zertteýshilerdiń sózine súıensek, aǵashtar qazir Mańǵystaý jerine jersiný prosesi júrip jatyr. Eger synaq sátti júzege assa bul aǵashtar 4-5 jyldan keıin jemis bere bastaıdy.

– Meni bıologıa men botanıka 7-synyptan bastap qyzyqtyra bastady. Nátıjesinde men ártúrli olımpıadalar men konkýrstarǵa qatysa bastadym. Ótken jyly bizge ustazymyz osyndaı ıdeıany usynǵan kezde biz qýandyq. Óıtkeni óńirde jemis aǵashtaryn otyrǵyzý, jalpy kógaldandyrý máselesi óte ózekti bolyp tur, - deıdi Almaz Nurjanov.

Jas botanıkter aldaǵy ýaqytta zertteý jumystaryn jalǵastyryp, Mańǵystaýdaǵy erekshe jemis aǵashtary otyrǵyzylǵan baqty júzege asyrǵylary keledi.