Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda saýda salasyn damytý jáne elimizdiń eksporttyq áleýetin kúsheıtý memleket saıasatynyń basym baǵyttarynyń biri retinde ataldy. Prezıdent otandyq taýar óndirýshilerdiń pozısıasyn nyǵaıtý, shıkizattyq emes eksport kólemin arttyrý, shaǵyn jáne orta bızneske qolaıly jaǵdaı jasaý sıaqty naqty mindetter qoıdy. Úkimet Memleket basshysynyń tapsyrmalaryn júzege asyrý úshin bıznesti júrgizýdiń ashyq qaǵıdalaryn ázirlep, ishki saýdany damytýda jáne otandyq taýarlardyń syrtqy naryqqa shyǵýyna qajetti ınfraqurylym qalyptastyrady.
Qabyldanǵan sharalar kesheniniń nátıjesinde sala turaqty ósýdi kórsetip otyr: 2025 jylǵy qańtar–shilde aılarynda saýda kólemi 8,6%-ǵa, al ınvestısıa kólemi İ jartyjyldyqta 37%-ǵa ósip, 438 mlrd teńgege jetti.
«Saýda salasynda 800 myńnan astam bıznes sýbektisi aınalysyp, 1,5 mln-nan astam adamdy jumyspen qamtamasyz etip otyr. “Aıtyldy-jasaldy" qaǵıdaty boıynsha Memleket basshysynyń Qazaqstan halqyna Joldaýynda aıtqan tapsyrmalary belsendi túrde júzege asyrylýda», — dep atap ótti saýda jáne ıntegrasıa mınıstri Arman Shaqqalıev.
Naryqty qorǵaý jáne qazaqstandyq taýarlardy ilgeriletý
Úkimet ishki naryqty qorǵaýǵa jáne otandyq óndirýshilerdi qoldaýǵa baǵyttalǵan retteýshi sharalardy ázirledi. 2025 jyldyń mamyr aıynda taýarlardyń shyǵarylǵan elin aıqyndaý máseleleri boıynsha Qazaqstan Respýblıkasynyń zańnamasyna ózgerister engizildi. Otandyq taýar óndirýshilerdiń biryńǵaı tizilimi jasalady onda óndirýshiler týraly naqty derekter jınaqtalyp, olarǵa memlekettik qoldaý sharalaryna, sondaı-aq memlekettik jáne kvazımemlekettik satyp alýlarǵa qol jetkizý múmkindigi qamtamasyz etiledi.
Saýdany yntalandyrý jáne dúken sórelerindegi otandyq taýarlar úlesin arttyrý maqsatynda qazaqstandyq óndirýshiler ónimderi úshin keminde 50% sórelik keńistikti kózdeıtin baǵdarlama iske qosyldy.
Sonymen qatar sapasyz ári qaýipti ónimderdiń ishki naryqqa enýine shekteý qoıý baǵytynda belsendi jumys júrgizilip jatyr.
«Barlyq baqylaýshy organdardyń qatysýymen Ahýaldyq shtab tıimdi jumys atqarýda. 47 myńnan astam kólik tekserildi, taýarlyq salmaqta bul 600 myń tonnadan astam mal sharýashylyǵy ónimderi. Onyń ishinde 900-den astam avtokólik keri qaıtaryldy, 1 myńnan astam sáıkestikti rastaý qujattarynyń kúshi joıyldy», — dep atap ótti Arman Shaqqalıev.
