«Nur Otan» partıasy janyndaǵy «Miras» respýblıkalyq qoǵamdyq keńesiniń jańa quramdaǵy bıylǵy alǵashqy otyrysy ótti. Parlament depýtattary, ýákiletti mınıstrlikter men mekemelerdiń basshylary, kıno salasynyń mamandary, sarapshylar, keńes músheleri qatysqan basqosýda otandyq kınematografıa salasyndaǵy ózekti máseleler men el táýelsizdiginiń 30 jyldyǵy mereıtoıyn ótkizý jónindegi is-sharalar josparynyń atqarylý barysy áńgime arqaýyna aınaldy.

Keńes tóraǵasy, májilis depýtaty Janarbek Áshimjannyń aıtýynsha, 2019 jylǵy 3 qańtarda «Kınematografıa týraly» Zań qabyldanyp, alǵash ret kıno óndirisin qoldaý sharalary qarastyrylǵanymen, osy salada áli de ózekti máseleler bar.

– Atalǵan Zań aıasynda úlken jumystar júrgizilip jatyr. Degenmen, áli de shıkilikter bar, kóp máseleler tıisti deńgeıde iske aspaı jatqandaı. Atap aıtsaq, ulttyq kınonyń qazirgi damý jaǵdaıyndaǵy kórkemdik sapasy; kınoteatrlarda fılmderdiń memlekettik tilde kórsetilýiniń azdyǵy; sheteldik jáne otandyq fılmderge suranystyń arasyndaǵy aıtarlyqtaı alshaqtyq; fılmderdiń qazaq tiline aýdarylýynyń sapasy; qazaq tiline dýblájdalǵan fılmderdiń azdyǵy; kınokórsetilim men kórermender sanynyń monıtorıńisiniń joqtyǵy máseleleri, – dedi Janarbek Áshimjan.

Keńes otyrysyna qatysqan mádenıettanýshy, pýblısıs Serik Erǵalı óz baıandamasynda «Ulttyq kınony qoldaý memlekettik ortalyǵy» janynan qoǵam jáne óner qaıratkerlerin qatystyryp, Qamqorlyq keńesin qurý kerektigin tilge tıek etti. Elde qazaq tildi bilikti, talǵampaz senarıster tapshy ekenin aıta kele, kıno-kórkem syndy, kıno-dramatýrgıany damytýǵa arnalǵan sharalardy qolǵa alý, «Qazaqfılm» janynan irgeli Dýbláj stýdıasyn jasaqtaý týraly usynys bildirdi.

Mádenıet jáne sport mınıstri Aqtoty Raıymqulovanyń aıtýynsha, qabyldanǵan «Kınematografıa týraly» zańda qazaqstandyq jáne sheteldik bıznes-qurylymdar úshin kınobıznesti tartymdy etetin, Qazaqstan Respýblıkasynyń aýmaǵynda fılmder shyǵarý men ulttyq fılmderdi prokattaý kezeńinde salyqtyq jeńildikter men basqa da preferensıalar kózdelgen. Sonymen birge, Fılmder monıtorıńiniń biryńǵaı avtomattandyrylǵan aqparattyq júıesin qurý boıynsha da jumystar júrgizilip jatyr.

Partıanyń saılaýaldy baǵdarlamasyndaǵy mádenıet, rýhanıat salasyna qatysty birqatar mindetterdi ýaqytyly atqarýda Mádenıet jáne sport mınıstrligi tarapynan kidirister bolyp qalýy múmkin ekendigine toqtalǵan «Nur Otan» partıasynyń hatshysy Álibek Áldeneı atalǵan máselege aıryqsha nazar aýdarý qajettigine toqtaldy.

– Ózderińiz bilesizder, saılaýdan keıin Elbasynyń, úkimet basshysynyń qatysýymen Fraksıanyń otyrysynda Jol kartasy bekitilgen. Jol kartasynda úkimet músheleriniń árqaısysy partıa múshesi retinde qol qoıyp, onda kózdelgen mindetterdi oryndaý merzimderin belgiledi. Sol merzimderge sáıkes ár tarmaǵyn ýaqytyly jáne sapaly oryndaýdy qadaǵalaý – Fraksıa depýtattarynyń jáne jalpy ár partıa múshesiniń basty maqsat, mindeti. Sondyqtan, Aqtoty Rahmetollaqyzy, dál qazirgi ýaqytta zańǵa tıisti ózgerister ýaqytyly qabyldanbasa, soǵan baılanysty Jol kartasynyń tarmaqtaryn oryndaý merzimi keıinge yǵystyrylýy múmkin. Buǵan jol berýge bolmaıdy. Sondyqtan osy máseleni tikeleı baqylaýda ustaǵan jón, – dedi Álibek Áldeneı.

Kún tártibindegi ekinshi másele boıynsha Aqparat jáne qoǵamdyq damý mınıstri Aıda Balaeva sóz sóılep, el Táýelsizdiginiń 30 jyldyǵy mereıtoıyn daıyndaý jáne ótkizý jónindegi is-sharalar keshenimen tanystyryp, onyń negizgi blok boıynsha júrgizilip otyrǵanyna toqtaldy. Jospar aıasynda negizinen respýblıka aýqymynda ótetin iri merekelik oqıǵalar qamtylǵan.

– Tulpar minip, tý alǵan» respýblıkalyq baıqaýynyń jetekshisi Arman Abdollaevtyń Táýelsizdiktiń 30 jyldyǵy mereıtoıy qarsańynda óskeleń urpaqty ulttyq rýhta tárbıeleýge baǵyttalǵan «Qazaq Epos» respýblıkalyq aǵartý jobasyn búkil óńirde ótkizýge «Nur Otan» partıasy tarapynan qoldaý suraǵan usynysy otyrysqa qatysýshylar tarapynan qoldaý tapty.

«Atalǵan usynys qoldaýǵa laıyqty dúnıe dep oılaımyz. Jalpy, qazirgi kúni ózi dombyra tartpaq túgili, aýzynan durys qazaqy sóz ala almaıtyn kezeń bolyp tur ǵoı. Sondyqtan urpaqtarymyz dombyrany úırenip jatsa quba qup árıne. Nasıhatty barlyq jaqtan arttyrýymyz kerek dep oılaımyn, – dedi keńes tóraǵasy Janarbek Áshimjan.

«Astana» telearnasynyń jetekshisi Qurmanbek Jumaǵalı Táýelsizdiktiń 30 jyldyǵy mereıtoıy qarsańynda Táýelsizdiktiń tarıhı kezeńderi qamtylǵan, Qazaqstannyń tuńǵysh prezıdenti, Elbasy N.Nazarbaevtyń eńbegi týraly derekti fılm, sújet, reportaj, suqbat formatynda jınaqtalǵan barlyq materıaldaryn ortaq resýrsqa quıyp, júıeli túrde rettep, árkim kez-kelgen ýaqytta paıdalana alatyndaı bir ortaq platforma jasaý jónindegi usynysy Keńes músheleriniń kóńilderinen shyqty.

Sonymen qatar Keńes barysynda «Nur Otan»-nyń ulttyq qundylyqtardy damytý baǵytynda ótkiziletin partıalyq is-sharalardy júıeleý jáne birizdendirý maqsatynda «Ulttyq mura» partıalyq jobasyn bekitý jóninde usynys ortaǵa salynyp, maquldandy. Bul joba «Rýhanı Jańǵyrý» baǵdarlamasynyń baǵyttaryn júıeli iske asyrýǵa yqpal etip, ózekti máselelerdi osy «Miras» keńesiniń alańynda turaqty talqylaýǵa múmkindik bermek.

Otyrys qorytyndysy boıynsha úkimetke joldaý úshin birqatar usynystar tujyrymdaldy. Atap aıtqanda, «Kınematografıa týraly» Zańǵa Qazaqstan aýmaǵyna taralýyna prokattaý kýáligin berý úshin fılmniń qazaq tilindegi mindetti dýblájyn ne qazaq tilindegi túpnusqa nusqasyn talap etý; qazaq tilinde kórsetiletin ne dybystalǵan Ulttyq fılm sanatyna jatatyn kınolardy kınoteatrlarda praım taım ýaqytynda kórsetý týraly ózgerister men tolyqtyrýlar engizý; «Ulttyq kınony qoldaý memlekettik ortalyǵy» irikteıtin jáne qarjylandyratyn fılmderde «Kınematografıa týraly» Zańda anyqtamasy berilgen áleýmettik mańyzy bar fılmderge basymdyq berý.