Astanadaǵy saýda oıyn-saýyq ortalyqtarynyń birinde ornalasqan «Kınopark» jelisiniń qyzmetkerin tepkilegen Qýanysh Týrakeldıev QR premeri kanselárıiniń bas ınspektory Bolat Týrakeldıevtiń uly bolyp shyqty. Bul týraly «Qamshy» portaly  informburo.kz-ke silteme jasaı otyryp habarlaıdy.

Astanadaǵy «Sary Arqa» oıyn-saýyq ortalyǵynda ornalasqan «Kınopark» jelisinde esepshi qyzdy tepkilegen Qýanysh Týrakeldıev QR premeriniń kanselárıinde bas ınspektor bolyp qyzmet atqaratyn Bolat Týrakeldıevtiń uly bolyp shyqqan. Bul aqparatty QR premer-mınıstriniń baspasóz qyzmetindegiler de rastaǵan.

Ǵalamtor jelisinde belgisiz jigittiń qyzmetke kóńili tolmaǵandyqtan esepshi qyzdy teýip jibergen vıdeosy jaryq kórgeni týraly osyǵan deıin jazǵan bolatynbyz. Al áleýmettik jelide taralǵan bul vıdeo kópshiliktiń ashýyn týǵyzǵan. Keıin quzyrly organ qyzmetkerleri «karatarısttiń» aty-jónin naqtylaǵanda esepshi qyzdy tepken jigittiń 22 jastaǵy Qýanysh Týrakeldıev ekeni anyqtalǵan.

Qazirgi tańda Qýanysh Týrakeldıevtiń áleýmettik jelilerdegi barlyq paraqshalary óshirilgenimen, onyń sýretin «Za tebá, Báke» jarıalaǵan.

Al «Kınopark» jelisiniń PR qyzmetkeri Erlan Buharbaev atalmysh ınsıdentke qatysty aqparat berýden bas tartqan.

«Men qazir densaýlyǵyma baılanysty jumysta emespin. Biraq, búgin keshke deıin jumysqa baramyn. Keshke habarlasaıyqshy, sosyn sóılesermiz. Men qazir ne bolyp jatqanynan beıhabarmyn. Naqty eshnárse aıta almaımyn qazir»,-deıdi Buharbaev.

Al japa shekken esepshi qyzdyń densaýlyǵyna qatysty «Kınopark» ókili «Esh alańdamańyzdar, biz barlyǵyn qadaǵalaımyz. Sol úshin de keshke habarlasyńyzdar. Men sizderge naqty jaýaptar beretin bolamyn» degen.

Alaıda keshke habarlasqan informburo.kz jýrnalıseri Erlan Buharbaevtan mardymdy jaýap ala almaǵan.

Tek ýáde boıynsha habarlasqan jýrnalıske «Oı, men qazir bos emespin, densaýlyǵyma baılanysty demalystamyn. Erteń habarlasyńyzdar dedim ǵoı. Boldy, boldy.. rahmet!»,-dep jaýap qatqan Buharbaev myrza.

Al «Kınopark» jelisiniń ózge de qyzmetkerleri japa shekken esepshi qyz sol oqıǵadan keıin jumysqa múlde kelmegenin aıtady.

Túıin: Esterińizde me, Elbasy Nursultan Nazarbaev byltyr Almatyǵa kelgende «júgensiz ketken sheneýnikterdiń balalaryn» tártipke salýdy talap etken edi ǵoı. Qyzmeti mardymsyz quqyq qorǵaý oryndary men baı-baǵlanǵa áli kelmeıtin quzyrly oryndardyń qyzmetin iske alǵysyz dep irep salǵan. Solaı ekeni ótirik emes qoı. Áke-sheshesiniń ataǵy men joǵarǵy qyzmetine masaırap júrgen bılik basyndaǵylardyń balalarynyń erkeligin el qashanǵy kótersin? Byltyr Almaty qalasynda dókeı ákesine sengen dóńbas «shýmaher» shataq qylyp edi. Endi Kárim Másimovtiń kanselárıiniń bas ınspektory balasyn basymen jibergen eken. Keıbir derekterge súıensek, «karatıst» tergeý ızolátoryna qamalǵan. Tergeý jumystary júrgizilýde. Degenmen Qazaqstanda  kók qaǵazdyń quzyreti «zańnan» da qudyretti ekenin biz jaqsy bilemiz. Sondyqtan tıisti jaza taǵaıyndalýy tıis dep esepteımiz...

Nurgeldi Ábdiǵanıuly

«Qamshy» silteıdi