Balalar ádebıetiniń jazýshysy, aqyn Qastek Baıanbaı qaıtys boldy. Bul týraly aqparat jáne qoǵamdyq damý mınıstri Aıda Balaeva facebook paraqshasynda jarıalady.
– "Bar ádebıettiń bastaýy – balalar ádebıeti” degen Qastek aǵamyz óziniń búkil sanaly ǵumyryn balalar ádebıeti jolyna arnap, jalyndy óleńder men áńgimeler jazdy, mazmundy aýdarmalar jasady, qazaq jýrnalısıkasyn damytýǵa aıanbaı eńbek etti. Aǵamyzdyń mol ádebı murasy – tozbas rýhanı qazyna bolyp, zıaly bolmysy – qalyń oqyrman qaýymnyń máńgilik esinde saqtalady. Marqumnyń jatqan jeri jaryq, topyraǵy torqa bolyp, nury peıishte shalqysyn, – dep jazady mınıstr.
Qastek Baıanbaı 1936 jyly 15 qarashada Almaty oblysy Alakól aýdanyndaǵy Taldybulaq aýylynda týǵan. Qazaq memlekettik ýnıversıtetin bitirgen. Jýrnalısıka salasyndaǵy eńbek jolyn 1960 jyldan bastaǵan. 1971-1995 jyldary "Jazýshy" baspasynda redaksıa meńgerýshisi "Jalyn" baspasynda bas redaktor qyzmetterin atqarǵan.
Balalarǵa arnalǵan "Arǵymaq" degen alǵashqy jınaǵy "Jalyn" baspasynan jaryq kórdi. Aqynnyń óleńderi mektep oqýlyǵyna engen, ertegileri boıynsha mýlfılm túsirilgen. Shyǵarmalary orys, ýkraın, ózbek, bolgar, ázirbaıjan tilderine aýdarylǵan.1986 jyly "Tátti sabaq" jınaǵy úshin İlıas Jansúgirov atyndaǵy syılyq berildi. 2005 jyly "Eren eńbegi úshin" medalimen marapattalǵan.
Pikir qaldyrý