Aıdarbaev prezıdentke ulttyq kompanıanyń byltyrǵy atqarǵan jumystarynyń nátıjeleri týraly esep berip, orta merzimdegi damý strategıasy tanystyrdy.

Sonymen qatar ol Toqaevqa "QazMunaıGaz" kompanıasynyń daǵdarys jaǵdaıynda qarjylyq turaqtylyqty saqtaǵanyn jáne qazirgi ýaqytta pandemıaǵa deıingi kórsetkishterge qol jetkizý baǵytynda jumys júrgizilip jatqanyn málimdedi.

"Memleket basshysyna Kaspıı qaırańyndaǵy paıdaly qazbalardy ıgerý jónindegi "Abaı", "Isataı", "Jeńis" jáne "Ál-Farabı" sıaqty ınvestısıalyq jobalardyń qazirgi mártebesi týraly aqparat berildi. Alık Aıdarbaev polıpropılen, polıetılen jáne býtadıen óndirisi boıynsha munaı-gaz hımıasy jobalaryna qatysty jumystardyń barysyna arnaıy toqtaldy. Sonymen qatar jańartylatyn qýat kózderin damytý jáne kómirteginen tazartý jónindegi kompanıanyń josparlary týraly aıtty.

"QazMunaıGaz" UK" AQ basqarma tóraǵasy Prezıdentke ulttyq kompanıanyń iske asyryp jatqan áleýmettik mańyzy bar jobalary jaıynda, atap aıtqanda, "Astrahan-Mańǵyshlaq" magıstraldy sý qubyrynyń qaıta jóndelýi jáne Mańǵystaý oblysynyń Kendirli kentindegi sý tushytatyn zaýyttyń qurylysy týraly baıandaldy" delingen resmı saıt habarlamasynda.

Kezdesý qorytyndysy boıynsha Qasym-Jomart Toqaev Alık Aıdarbaevqa ulttyq kompanıanyń qarjylyq turaqtylyǵyn odan ári saqtaýǵa, ınvestısıalyq jáne ınfraqurylymdyq jobalardy iske asyrýǵa, jańartylatyn qýat kózderin paıdalanýǵa qatysty birqatar tapsyrma berdi. Sondaı-aq jumyspen qamtý máselesin jáne kompanıa qyzmetkerleriniń áleýmettik jaǵdaıyn baqylaýda ustaýdy tapsyrdy.