Keshegi kúnniń ótkir sózi Prezıdenttiń aýzynan shyqty. Joq jerden  «qamshy úıirdi». Aıtqan jeri de - aıryqsha. Hannan aqyryp teńdik suraǵan Syrym batyr, Isataı men Mahambetter at tuıaǵyn dúbirletken Atyraý jerinde aıtty. Sondaǵy aıtylǵan sóz mynaý: «...Osyndaı qıyn-qystaý kezeńde eldi arandatatyndar shyqsa, olardy ákesin tanytyp zańmen jazalaımyz». Durys aıtady! Qazaqstanda «ákesin tanymaı» ketip, eldi arandatqandardyń qatary «qoıdaı órip» júr. Solardy da osy jazaǵa ilindirý qajet. Atap aıtqanda:

• Táýelsizdikti alǵanymyzǵa 24 jyl bolsa da, ekonomıkany ár taraptandyrýdy júzege asyra almaǵan Úkimettiń «ákesin tanytý» kerek;
• Qazba baılyǵymyz kóp, shalqyp ómir súretin «ekinshi Kýveıt» bolamyz dep eldi aldaǵan arandatýshynyń «ákesin tanytý» qajet;
• Kórshi eldiń jerin tartyp alyp, onyń tórinde oıran salyp júrgen elmen Odaq bolýdy qalap, eldi «qoraǵa tyqqan» arandantýshylardyń «ákesin tanytýǵa» tıispiz;
• Kórshi elde ekonomıkalyq daǵdarys bastalǵanda onyń aldyn alýmen aınalysýdyń ornyna Prezıdenttik saılaýdy erte ótkizip, eldi dúrliktirgen belsendilerdiń «ákesin tanytyp», alda-jalda mundaıdy qaıtalamaıtyndaı etý kerek;
• Baılyqtaryn shetelge asyryp, ony ózge eldiń bankterinde sheteldik valútamen saqtap, teńgeni mensinbeı otyrǵan arandatýshylardyń «ákesin tanytyp» jiberýge tıispiz.

Aıta bersek, kóp sekildi. Osymen biz doǵaraıyq.  Taǵy arandatýshylar bolsa, osy tizimniń sońyna qosý kerek. «Temirdi qyzǵan kezde soq» demeıtin be edi?! Quqyq qorǵaý mekemeleri ári qaraı ilip alyp keter...

Dáýlet Kóptileý