Batys Qazaqstan oblysynyń Berezovka aýylynda búgin taǵy bir oqýshy - Lúbov Voskoboı sabaq kezinde esinen tanyp qaldy. Bul týraly «Qamshy» portaly Azattyqqa silteme jasaı otyryp habarlaıdy.
Azattyq saıtynyń aqparattaryna suıensek, mektep dırektory oqýshynyń talǵanyn vıdeoǵa túsirýge kedergi keltirgen. Ata-analar men jergilikti dárigerlerdiń sózinshe, sońǵy eki aptada oqýshylar arasynda ózin nashar sezinip, shaǵymdanǵandar sany da artqan.
Sońǵy kezderi Qazaqstannyń aýa keńistiginde medısına men ekologtardyń dármensizdik tanytqan «sebepsiz» syrqattar jıilep ketkeni jasyryn emes. Biz bul taqyrypty birinshe márte qaýzap otyrǵan joqpyz desek te, saldary tabylmaǵan túrli kesapattar tyıylar emes. Buǵan asa mán berip júrgenmiz de shamaly. BAQ biraz ýaqyt bajaılaǵanymen máseleni túbine jetkizgen eshkim joq ekeni de jasyryn emes. Buryn-sońdy kóz-kórip, qulaq estimegen indetterdi zertteý úshin arnaıy shetelden mamandar shaqyrǵanymyzben, tujyrymdama kórsetken sebepterge sengimiz joq. Basqasyn aıtpaǵanda, bir ǵana Berezovka aýylynyń balalary «talmadan» kóz ashpaýda.
Ótken jyldyń qarashasynda 30-dan astam bala birinen soń biri talyp qalǵandyǵy týraly jazǵan bolatynbyz. Ol kezde dárigerler «sharshaǵannyń áseri» degen kúlkińizdi keltiretin dıagnoz qoıǵan. Sodan jalǵasqan indet sáýirdiń orta sheninde de shyrǵalań salǵan-dy. Ol kezde balalary ýlanǵan ata-analar «uıqy dertiniń» belgileri baıqala bastaǵanyn aıtyp bazynalaǵan edi. Buǵan da pysqyryp qaraǵan bireý tabylmady.
Qarashyǵanaq ken ornynan bes shaqyrym jerde ornalasqan Berezovka aýylynda 2014 jyldyń qarashasynda balalar jappaı ýlana bastaǵan. Aýyl turǵyndarynyń kóbi munyń sebebin Qarashyǵanaq munaı-gaz kondensaty kenishinen shyǵatyn zıandy qaldyqtardan kóredi eken. Óıtkeni, kenish aýyldan bes shaqyrym qashyqtyqta ǵana ornalasqan. Al konsorsıým basshylyǵy "barlyq qaldyqtar men gazdar ekologıalyq talaptardy saqtaı otyryp shyǵarylatynyn" aıtyp aqtalǵan.
Sáýir aıynyń basynda Qazaqstanǵa kelgen BUU-nyń ýly qaldyq zattar jónindegi arnaıy ókili Bashkýt Týnchak Aqmola oblysyndaǵy Kalachı jáne Batys Qazaqstan oblysyndaǵy Berezovka aýyly turǵyndaryn kóshirý qajet degen. Alaıda, bul sheshim aıtylǵan kúıinde qalǵany ótirik emes.
Kúni keshe ǵana memleket basshysymen kezdeskende oblys ákimi Nurlan Noǵaev myrza Elbasynyń aldynda eki alǵan baladaı kekeshtenip turǵany týraly qazaqstandyq BAQ jazǵan bolatyn. Iá, ákim basyn kóterip turýǵa qaýqary jetpedi. Óıtkeni, Elbasynyń ózi Berezovka aýylynyń turǵandarynyń jaǵdaıyn sóz etken-di. Osyǵan deıin Berezovkaǵa qatysty ózine shań jýytpaǵan ákim aqyry bar shynyn aıtty. Aıtpasqa sharasy qalmady.
Batys óńirleri ákimderin jınaǵan Elbasy Nurlan Noǵaevtyń basynan sıpaı qoımaǵany ras.
Memleket basshysy Berezovka aýylynyń turǵyndarynyń ne sebepti tútinnen talyp qalǵandaryn surady.
«Bestaý degen aýdandaryńnyń halqy zardap shekkenin barlyǵy estip qaldy. Ne istep jatyrsyńdar?»,-dedi Prezıdent pármendileý únmen.
“Komısıanyń sheshimi boıynsha bul jerde kóptegen faktorlardyń túıisýi bar. Bir sheshimi mekteptiń syrtynda kotelnyı bar. Sodan shyqqan tútin áni jerdegi óziniń «P» obraznyı mektep myna ortasynda esik bar eken. Bir versıasy sol kotelnyıdan shyqqan”, – dedi BQO ákimi Nurlan Noǵaev.
Osy joly sózden jańylǵan Noǵaev myrza jyl aıaǵyna deıin turǵyndardyń barlyǵy tolyqtaı kóshiriledi dep túıin jasady. Endi kútý ǵana qaldy. Elbasy men ákimniń arasyndaǵy suhbattyń ertesi kúni-aq, Berezovkada taǵy da oqýshylar talyp qaldy. Endi ákim ne isteıdi? Jyl aıaǵyn kúte me, álde jyldam shara qoldana ma?
Nurgeldi Ábdiǵanıuly
