Fransıa senaty adam densaýlyǵyna zıany dáleldengendikten 2017 jyldan bastap jasandy kúnge kúıý kabınalaryna tyıym salý týraly sheshim qabyldady. Bul týraly «Qamshy» portaly BNews.kz  saıtyna silteme jasaı otyryp habarlaıdy.

 Atap ótý kerek, senat mundaı sheshimdi úkimettiń pikirine qaramastan qabyldap otyr. Senatorlar mundaı qorytyndyǵa densaýlyq saqtaý júıesine reforma engizetin jańa zań jobasy aıasynda keldi.  «Solárıılerdiń qaýpi sol, ony jıi paıdalanýdan teriniń qaterli isigi týyndaıdy. Muny Qaterli isikti zertteý halyqaralyq agenttigi dáleldep otyr», - dep málim etti senator Jan-Fransýa Lonjo. Onyń aıtýynsha, sońǵy on jylda teriniń qaterli isigine shaldyqqandar sany eki esege artqan. 
Mamandardyń eskertýi men senatorlardyń tyıymyna qaramastan, zań jobasyndaǵy jańa tyıymǵa parlamenttiń tómengi palatasy  Ulttyq májilistiń kelisim bereri ekitalaı. 
«Últrakúlgin sáýlelerdiń zıany dáleldendi, sondaı-aq melanoma dertine shaldyqqandar sanynyń jyl saıyn artyp otyrǵany bizdi qandaıda bir áreketterge ıtermeleýi tıis. Biraq bul tyıym salý kerek degendi bildirmeıdi», - dedi Fransıa densaýlyq saqtaý mınıstri Marısol Týren.
Ázirge depýtattar jasóspirimderdiń solárıı paıdalanýyna jáne onyń jarnamasyna tyıym salý sheshimin qoldap daýys berdi. Bulletin épidémiologique hebdomadaire mamandandyrylǵan basylymy 2012 jyly jarıalaǵan málimetterge qulaq túrsek, Fransıada solárııdi paıdalanýdyń kesirinen týyndaǵan melanoma keselinen jylyna 76 adam kóz jumady eken. 

«Qamshy» portaly