Almaty qalasynyń bas sanıtar dárigeri Jandarbek Bekshın Óńirlik komýnıkasıalar qyzmetinde ótken brıfıńte vaksına qarqynynyń jetkiliksizdiginen jáne naýqastar sanynyń artýy saldarynan qalada karantın sharalaryn kúsheıtkenin aıtty.

Bekshınniń sózinshe, qalada epıdemıologıalyq jaǵdaı kúrt nasharlaǵan. Ótken táýlikte megapolıste 1 080 juqtyrý jaǵdaıy tirkelgen.

– Mundaı ósim densaýlyq saqtaý júıesine, medısına qyzmetkerlerine qıyndyq týdyrady. Óıtkeni ımýndyq qabat áli de jetilmegen. Qaladaǵy jaǵdaıdy turaqtandyrý úshin bizge halyqtyń 70% vaksına saldyrýy qajet. Búginde bizdegi málimet boıynsha ımýndyq qabat 40%-dy quraıdy. Koronavırýstyń taralýy ımmýndalmaǵan jáne aýyrmaǵan azamattar arasynda júrip jatyr, – dedi qalanyń bas sanıtar dárigeri.

Sondaı-aq ol vırýs juqtyrǵandardyń ósýi "delta" shtammynyń taralýymen baılanysty ekenin aıtty. Bul shtamm óte juqpaly ári aýyr klınıkalyq kórinisterdi týdyratynyn da atap ótti.

– Sońǵy aptada "sımptomdyq" naýqastardyń úles salmaǵynyń 88%-dan 90%-ǵa deıin ósýi baıqaldy. KVI aýrýshańdyǵy 1,4 ese ósti, táýliktik ósim 1%-dan asty. Bul asa qatań shekteý sharalaryn engizýdi talap etetinin, qoǵamda KVI taralýynyń joǵary ósý qarqynyn kórsetedi, – dedi J. Bekshın.

Ol "delta" shtammynyń juqpalylyǵy "brıtandyq" shtammnan áldeqaıda joǵary ekenin aıtty.