IýNESKO  osy ǵasyrdyń aıaǵyna deıin jer betindegi tilderiniń jartysyna jýyǵy joıylyp ketedi dep boljap otyr. Olardyń birtalaıy burynǵy KSRO-ǵa kirgen elderdiń aımaǵynda joǵalady dep kútilýde. Álbette til ózdiginen joǵalyp ketpeıdi. Oǵan saıası júıeniń yqpaly bar. Degenmen, til múldem sóıleýshisi qalmaǵan kezde joıyldy dep esepteledi.

2010 jyly IýNESKO «Joǵalyp jatqan álem tilderiniń atlasyn» jarıa etken bolatyn. Atlasqa 2500 til men dıalekt engen. Bir ǵana Eýropada joıylý qaýpinde turǵan 212 til bar eken. Taǵy 13-i taıaý arada múldem joq bolady dep kútilýde. Búgingi merekede ana tilińizge qurmet retinde ony shubarlamaı, taza sóıleýge tyrysyp kórińiz. Anyǵynda, analar kúninde de bizdi ómirge alyp kelgen sol bir janǵa asqan iltıpat kórsetýge tyrysyp baǵamyz ǵoı. Al, týǵan tilimiz de erekshe yqylas bólýge laıyq. Sizdiń mádenıetińiz ben rýhyńyzdyń deńgeıin ana tilińizge degen qurmetten-aq paryqtap alýǵa bolady.