Elimizde beıbit jınalystar men mıtıńiler, sherýler men pıketter jáne demonstrasıalar uıymdastyrýdyń ózidik tártibi qalyptastqan. Tipti bul tártipti biz zańmen bekitip qoıǵanbyz. Qazaqstan Respýblıkasynyń 2004.12.20. N 13 (2005 jylǵy 1 qańtardan bastap kúshine enedi) Zańynyń 2-babyna sáıkes Jınalys, mıtıń, sherý, pıket nemese demonstrasıa ótkizý týraly respýblıkalyq mańyzy bar qalanyń, astananyń, aýdannyń (oblystyq mańyzy bar qalanyń) jergilikti atqarýshy organǵa ótinish beriledi.
Jınalys, mıtıń, sherý, pıket nemese demonstrasıa ótkizý týraly ótinishterdi eńbek ujymdarynyń, qoǵamdyq birlestikterdiń nemese Qazaqstan Respýblıkasy azamattarynyń jekelegen toptarynyń on segiz jasqa tolǵan ýákilderi bere alady. Osy zańǵa súıenip Oral qalasynyń turǵyndary qalada mıtıń ótkizýge arnalǵan ekinshi ótinishin ákimdikke tapsyrdy. Uıymdastyrýshylar mıtıńti Mánshúk Mámetova atyndaǵy alańda 26 qyrkúıek kúni ótkizgisi kelgen. Alaıda, Oral qalasynyń İshki saıasat bóliminiń jetekshisi Baqytjan Narymbettiń aıtýynsha 26 qyrkúıek kúni ákimdik basqa shara ótkizýdi josparlap qoıǵan eken. Mıtıń Ulttyq banktiń qarjy-nesıelik saıasatyna qarsylyq bildirý maqsatynda uıymdastyrylmaq. Ekinshi márte jazylǵan ótinishte mıtıń ótkizý ýaqyty 2015 jyldyń 3- qazany dep kórsetilgen. Bul týraly «Qamshy» portaly «Total.kz-ke» silteme jasaı otyryp habarlaıdy.
Teńgeniń quldyrap ketýi men azyq-túlik baǵasynyń kúrt kóterilýine halyq tarapynan qarsylyq bildirilýi tıis bolǵan. Desede, qarsylyq bildirýdiń ózi ońaı sharýa emes. Aldymen ákimdikke ótinish bildirilýi tıis. Eger ákimdik sizdiń ótinishińizdi maquldamasa, siz zańǵa qaıshy áreket jasaǵan bolyp shyǵasyz. Osydan keıin jeke azamattardyń quqyǵyn zań qorǵaıdy degenge tolyqtaı senim artýǵa bola ma? Árıne ákimdikte otyrǵandar bir paraq qushaqtap, qarsylyq tanytamyn dep kelgenderge ruqsat bermeýge tyrysady. Meılinshe mıtıń ótkizetin alańdarǵa konserttik shara, nemese jastar jıynyn ótkizip baǵady. Onsyz da maqsatsyz yrdý-dyrdýǵa mas bolǵan jastar men turǵyndardyń ashýyn osylaı tarqatýdy olar ádetke aınaldyrǵaly qashan? Sol sebepti de bizde «Juldyz» degen atqa ıe qaharmandar paıda bola bastaǵan. Teledıdar púltiniń tetigin basa qalsańyz, ánshilerden kóz súrinedi. Qıt etse, solardyń ómirin ańdyp, qazaqtyń ómiri ótip bara jatyr. Óz ómiriniń qıyndyǵynan ábden jalyqqan jurt juldyzdardyń ertegi ómirine telmirip tánti bolýda. Biraq jypyrlaǵan sansyz juldyzdar aı sekildi jaryq shasha almaıdy. Al, aspandaǵy qara bultty túrip tastap, aıdyń jaryǵyn túsirý úshin qazirgi turmysymyzǵa qarsylyq bildirilýi tıis bolatyn. Biraq sál jaryǵyraq juldyz kórip qalyp, sony aı eken dep shúkirlik tanyta beretin halyqqa daǵdarystyń yzǵary áli sezile qoıǵan joq. Mamandar 2016 jyl esikten ene bergende daǵdarys týraly dabyr bastalady dep otyr.
Anyǵynda Ulttyq banktiń sońǵy áreketi tym tosyn boldy. Bul týraly «Qamshy» portaly arnaıy saraptama usynǵan bolatyn http://qamshy.kz/home/show/1469. Al, oǵan qatysty qarsylyqtar formaldi túrde bolsa da ótkizilýge tıis bolatyn. Olaı bolmaǵanda ekonomıkalyq júıeniń jaısyzdyǵyna qyńq etpeıtin qazaqqa mıyǵynan kúlýshiler kóbeıip keter edi.
Aınur Tóleý
