Shymkent qalasyndaǵy balalar aýrýhanasyna jedel járdem qyzmetimen bes jasar bala aýyr halde jetkizilgen. Densaýlyǵy syr bergen balaqaıdy dárigerler jansaqtaý bóilimne shuǵyl jatqyzyp, tekserý jumystaryn júrgizgen.

Naýqas baladan alynǵan synama nátıjesinde kavasakı tárizdes sındrom anyqtalǵan. Qaýipti indet anyqtalǵan balaqaıdyń jaǵdaıy alǵashqy úsh kúnde nasharlap ketken. Tek tórtinshi táýlik kúni ǵana naýqas balanyń densaýlyq jaǵdaıy turaqtalǵan,- dep habarlaıdy densaýlyq saqtaý basqarmasy.

Emdeý sharalarymen qatar mamandar ınfeksıaǵa shaldyqqan balanyń aǵzasyndaǵy ózgeristerdi der kezinde anyqtap, ómirine tóngen qaýipti aldyn alǵan.

Ata-anasynyń sózinshe, balasynda aýrýdyń alǵashqy belgileri baıqalǵanda, jekemenshik klınıkada em alǵan. Balada aýrý belgileri basylǵan soń, úıdegi úlkender syrqatyna mán bermepti. Alaıda araǵa bir apta salyp, balanyń jaǵdaıy kúrt nasharlap, jansaqtaý bóliminen bir aq shyqty deıdi.

Medısına mamandary balanyń dene qyzýy 38,5-ten joǵary bolsa, ish aýyrýy, qusý, júrek aınýy, denedegi bórtpe daq, jótel paıda bolsa, mindetti túrde dáriger shaqyrtý qajettigin eskertedi. Óıtkeni, bular – kavasakı tárizdes mýltıjúıeli qabyný sındromynyń belgileri. Der kezinde dárigerge kórinbese, sońy qaıǵyly jaǵdaıǵa alyp kelýi de yqtımal. Óıtkeni, aýrý júrek pen ókpe, asqazan, ishek joly nemese júıke júıesi sekildi aǵzanyń birneshe júıesin birden zaqymdaıdy.

Atalmysh aýrýdyń aldyn alý úshin eresekter balany koronavırýstan saqtaýǵa kúsh salýy kerek. Onyń birden bir joly – vaksına saldyrý. Sondyqtan dárigerler ár adam óz otbasyn qorǵaý maqsatynda ekpe saldyrýynyń mańyzy zor ekenin taǵy da atap ótti.