Shymkent qalasy Abaı aýdanynyń ákimi B.Parmanov @akimat_shymkent paraqshasynda turǵyndarmen tikeleı efırde kezdesti. Onda turǵyn úıdi basqarýdyń jańa túri týraly baıandap, turǵyndardan kelip túsken suraqtarǵa jaýap berdi

«Abaı aýdanynda jańa nysanǵa ótýge bolatyn 374 kópqabatty turǵyn úı bar. Búginde onyń 90-da jaı seriktestik jáne 52 kópqabatty turǵyn úıde múlik ıeleriniń birlestigi qurylyp, qalalyq ádilet departamentinde tirkeldi. Budan bólek, 3 úıdiń qujattary «Azamattarǵa arnalǵan úkimet" memlekettik korporasıasy» mekemesi arqyly rásimdeý jumystary júrgizilýde», - deıdi aýdan ákimi.

MIB – bir kóppáterli turǵyn úı páterleriniń, turǵyn emes úı-jaılarynyń menshik ıeleri qurǵan, ony kútip-ustaýdy qarjylandyratyn jáne onyń saqtalýyn qamtamasyz etetin, «bir úı - bir múlik ıeleriniń birlestigi - bir esepshot» prınsıpine negizdelgen zańdy tulǵa retinde tirkelgen komersıalyq emes uıym bolyp tabylady.

JS – zańdy tulǵa qurmaı, «bir úı – bir jaı seriktestik – bir esepshot» prınsıpi boıynsha jumys isteıdi.

B.Parmanov áleýmettik jeli qoldanýshylaryna jańa basqarý túriniń - kútip ustaýǵa jınalǵan qarajatty ózderi basqarady; jumystarǵa tapsyrys berýshini ózderi tańdap, oǵan baǵa bere alady; aýladaǵy ýchaskege memlkettik akt rásimdeý JBO arqyly júrgiziledi degen sekildi artyqshylyqtaryn túsindirip ótti.

Sonymen birge, tikeleı efır barysynda turǵyndar tarapynan 70-ke jýyq suraq qoıyldy. Saýaldardyń basym bóligi shalǵaı eldimekenderdiń ınfraqurylym máselesine qatysty boldy.

Odan bólek, aýdan ákimi jylý maýsymyna daıyndyq jumystary da júrgizilip jatqanyn aıtty. 15 tamyzǵa deıin jylý júıesine daıyn úıler sanyn 70 paıyzǵa jetkizý josparlanýda ekenin jetkizdi.