Shymkent qalasynyń Tótenshe jaǵdaılar departamenti jazǵy kezeńdegi shomylý maýsymynyń qaýipsiz ótýine erekshe nazar aýdarýda. Departament bastyǵy, azamattyq qorǵaý polkovnıgi Madıar Jaqsybaevtyń aıtýynsha, bul baǵytta praktıkalyq jáne profılaktıkalyq is-sharalar kesheni atqarylyp, birinshi kezekte sý aıdyndarynda balalardyń qaýipsizdigin qamtamasyz etý sharalary júzege asyryldy.

Tótenshe jaǵdaılar departamenti aýdan ákimdikterimen birge 2021 jyly balalardy, onyń ishinde turmys jaǵdaıy tómen januıalardyń balalaryn sýǵa shomylý oryndarynda júzýdi tegin úıretý boıynsha baseınderdiń ıelerimen 10 memorandým bekitti. Aǵymdaǵy jyly 500 balaǵa júzýdi úıretý josparlansa, qazirgi tańda 423 bala júzýdi úırendi.

Departament óz quzyreti sheńberinde Polısıa departamenti, jergilikti atqarýshy organdar, Ulttyq ulannyń №6506 áskerı bólimi, volonterlik uıymdarymen birlesip kún saıyn, demalys jáne mereke kúnderi qala aýmaǵynda ornalasqan tabıǵı jáne jasandy sý aıdyndaryndaǵy demalys oryndarynda qaýipsizdik sharalaryn ótkizedi.

Aıta ketý kerek, atqarylǵan jumystardyń nátıjesinde 31 adam ákimshilik jaýapkershilikke tartylyp, 452 myń 135 teńge aıyppul salynǵan. Shomylý kezinde óz kúshterin jete baǵalamaý faktisi boıynsha 2021 jyly 6 tamyzda Eńbekshi aýdanynyń Maıatas eldimekenindegi Badam ózeninde 1 oqıǵa tirkeldi. Iaǵnı, qala aýmaǵynda shomylý maýsymy bastalǵaly beri birinshi oqıǵa tirkelip otyr.