Ońtústik Qazaqstan oblysy Arys aýdanyna qarasty Montaıtas eldi mekeninde áldebireý jergilikti turǵyndardyń qysqa jınaǵan mal azyǵyna qyrǵıdaı tıip jatyr. Bul týraly «Qamshy» portaly otyrar.kz saıtyna silteme jasaı otyryp habarlaıdy.

Jem-shóp saqtaıtyn qora-qopsylary órtke oranyp, onyń tek kúli ǵana qalǵan. Ákki áreketimen aýyldy áýrege salǵan buzaqy áli kúnge ustatpaı júr. Oǵan tipti, polıseılerdiń  de pármeni jeter emes, deıdi aýyl turǵyndary.

Gúljahan Qabylovanyń qorasyn eki ret órtep jibergen. 50 shaqty býmasy men 5 kólikke tıep alyp kelgen saban-shóbi kúlge aınaldy. Aýlasynda tilsiz jaý áli tútep jatyr. Ala jazdaı adyrdan malyna azyq jınap, aýlasyna úıip tastaǵan eńbegi esh ketkenine kelinshek jylarman kúıde. Bul jergilikti jurtqa náýbet boldy dep shaǵynady. Bul týraly áýeli today.kz portaly habarlaıdy.

Qazir aýylda órt sóndirý qyzmeti men tártip saqshylary kezekte qoıylypty. Kún-tún demeı kúdiktini qolǵa túsirýdiń qamynda. Alaıda, eshqandaı nátıje joq.  Jatyn oryndarda arnaıy jasaq pen polısıa ókilderi túnep te shyǵady. Birneshe kúsh biriktirilse de, quzyrlylar buzaqyny áli kúnge quryqtaı almaı otyr.

Quzyrly organdar órt oqıǵalarynyń kóbine túngi mezgilde bolatynyn aıtady. Búginge deıin aýyldaǵy 17 qora qyzyl jalynǵa oranyp úlgeripti. Al tártip saqshylary aıǵaqty zatty saraptamaǵa jiberýden ózge tyndyrǵan isi joq.