QR Parlamenti májilisiniń Halyqaralyq ister, qorǵanys jáne qaýipsizdik jónindegi komıteti QR Májilisi vıse-spıkerin taǵaıyndady. Ol áleýmettik jelide «sekirgish-serke» atanyp ketken general-maıor Abaı Tasbolatov.
«Sizder ony jaqsy bilesizder. Ol Abaı Tasbolatov»,-dedi Májilis tóraǵasy Qabıbolla Jaqypov myrza. Al plenarlyq otyrysqa qatysýshy depýtattar ádettegi maquldaǵyshtyǵynan tanbaı, bul joly da bir aýyzdan Tasbolatovtyń kandıdatýrasyn maquldady.
Bul týraly «Qamshy» portaly total.kz saıtyna silteme jasaı otyryp habarlaıdy.
Ár jyldarda Abaı Tasbolatov myrza bólimshe komandırliginen respýblıkalyq gvardıa qolbasshylyǵyna deıin kóterilip, túrli memlekettik qyzmetterde bolǵan.
Abaı Tasbolatov kim?
Abaı Tasbolatov 1951 jyly SQO burynǵy Lenın aýdanynda dúnıege kelgen. RF Áskerı akademıasynyń bas shtabynda joǵary akademıalyq kýrstan tálim alǵan. Áskerı ataǵy – general-maıor. Tarıh ǵylymynyń doktory, profesor.
Eńbek ótili?
I.S.Konev atyndaǵy Almaty qalalyq jalpy áskerı ýchılıshesiniń rota komandıri bolǵan(1973-1980). 1992-1997 jyldary atalmysh oqý ornynyń basshysy bolady. Tasbolatov Qazaqstan Qarýly kúshteriniń áskerı akademıasynyń basshysy bolyp 1997-2002 jyldar aralyǵynda qyzmet etken. 2006 jyly QR Qorǵanys mınıstriniń orynbasary. 2011-2012 jyldary QR Parlamenti májilisine depýtat bolyp Nur Otan partıasynyń atynan túsken.
Alǵan marapattary:
QR 2-dárejeli «Dańq» ordeniniń ıegeri. Eń bastysy 2008 jyly «Til janashyry» erkertkish medalin alǵan.
Halyq aldyndaǵy masqaralyǵy
Depýtat Abaı Tasbolatov óziniń áıgili «sekirgishtiginen» keıin aty tanyla bastaǵan. Depýtattyń etıkaǵa múlde qaıshy bul áreketi áleýmettik jelide dereý tanymaldylyqqa ıe bolyp, qyzý pikir-talas týdyrǵan bolatyn. Onda depýtat Tasbolatov májilistiń kezekti otyrysyna keshigip kelip, dóńgelek ústelge sekirip mingen edi.Kópshilikti syılamaǵan bul áreketine ózge depýtattar qol soǵyp, ótirik kúlgennen ózge emeýrin tanytpady. Al dál sol kezde mektepterge elektrondy oqýlyq júıesin engizý máseleleri talqylanyp jatqan bolatyn.
Al osy oqıǵadan keıin Tasbolatovty sózge tartqan jýrnalıserge «senderdiń basqa sharýalaryń joq pa?!» dep lepirip tastaǵany taǵy bar.
Al sekirse de, lepirse de joq, kópirse de ózi biletin Tasbolatovtyń beımádenı áreketine qatysty áriptesteri Aıgúl Soloveva «Bul kishkene ǵana erkelik. Biraq ádepke qaıshy» degen bolatyn. Al karatıst depýtat Jambyl Ahmetbekov «Kerek bolsa, jumys ornyna otyrý úshin men «salto» sekirip bere alamyn. Al osyndaı mańyzdy másele talqylanyp jatqan kezde bulaı jasaý mádenıetsizdik boldy» deıdi.
Al, abai.kz saıtynyń jazýynsha, tarıh ǵylymynyń kandıdaty Jumamurat Shámshi myrza parlament depýtaty, general-maıor Abaı Tasbolatovty kórip qalyp: -Assalaýmaǵalaıkým, Ábeke, qalyńyz qalaı?—dese, ol kisi «Elbasynyń arqasynda» dep jaýap bergen-mys.
Qazirgi zamannyń generaly baıaǵy zamannyń batyrylary sıaqty arystandaı aıbatty, jolbarystaı qaıratty bolmas pa edi?..
Jalpy, bodandyqta kóp bolǵan el jaltaq, taıǵaq, kóngish bolatynyn ıtalıandyq ǵulama Nıkolo Makıavellı aıtqan eken. Dál aıtsa kerek-ti.
«NurQazaqstanda» atqarylǵan kez kelgen bolmashy isterdiń barlyǵyn Elbasynyń esimimen baılanystyrý búgingi kúnniń basty –modasyna aınalyp ketkeni de jalǵan emes.
Túıin: eks-depýtat, vıse-spıker Darıǵa Nursultanqyzy ákesiniń jarlyǵymen Vıse-premer-mınıstr laýazymyna kóterilgennen keıin májilistegi oryntaq bosap turǵany belgili. Májilis tóraǵasy Qabıbolla Jaqypov óziniń kómekshisi etip basqa-basqa emes dál osy Tasbolatovty tańdaǵanynyń astarynda ne jatyr? Birinshiden – general-maıor, áskerı tájirbıesi jetkilikti. Ekinshiden – profesor, tarıhty jetik biletin ǵylym doktory. Halyqtyń arasynda «sekirgish - serke» atanyp ketken Abaı Tasbolatov myrza vıse-spırker bolǵanda ne ózgeredi, ne ózgermeıdi? Onsyz da ádep degennen ádire depýtattar men sheneýnikter az ba edi? Bizge ne kelip, ne ketip jatyr, deımiz aýyr kúrsinip...
Nurgeldi Ábdiǵanıuly
