Shymkent qalasynyń jumyspen qamtý jáne áleýmettik qorǵaý basqarmasynyń málimetinshe, shilde aıynda 9746 otbasyǵa, ıaǵnı, 45 046 azamatqa ataýly áleýmettik kómek tólengen. Ataýly áleýmettik kómekke ótinishti elektrondy úkimet portaly arqyly onlaın tapsyryp, azamattar ózderine qatysty málimetti ESQ kiltin qoldanyp bile alady.

Halyq densaýlyǵynyń qaýipsizdigin qorǵaý maqsatynda AÁK alýǵa qujat tapsyrý, onyń taǵaıyndalǵany jóninde bilý jáne tólemderdi júrgizý jumystarynyń barlyǵy onlaın júıede atqarylýda. Ol azamattardyń ýaqytyn únemdeýge múmkindik beredi.

Jalpy ataýly áleýmettik kómek Qazaqstan Respýblıkasynyń «Memlekettik ataýly áleýmettik kómek týraly» Zańy men «Memlekettik ataýly áleýmettik kómekti taǵaıyndaý jáne tóleý qaǵıdalaryn bekitý týraly» zańyna sáıkes, otbasynyń tabysy kedeıshilik sheginen aspaıtyn adamǵa nemese otbasyǵa taǵaıyndalyp, tólenedi.

2021 jyldyń úshinshi toqsany boıynsha kedeıshilik shegi 23 678 teńgeni quraıdy. Sonymen qatar, tabysy az otbasylardyń balalaryna kepildendirilgen áleýmettik toptamanyń 260 myńnan astamy taratyldy. 1 jastan 6 jasqa deıingi balalarǵa azyq-túlik taýarlary aı saıyn, al turmystyq hımıa toqsan saıyn taratylýda. Azyq-túlik taýarlarynyń ishinde túrli jarma, sút, shyryn, púre jáne t.b. bar. Bul azyq-túlik ónimderin temir men basqa da dárýmenderdiń, mıneraldardyń jetispeýshiligin eskere otyryp, Densaýlyq saqtaý mınıstrliginiń usynysy boıynsha taratylady. Ár balaǵa bir kepildendirilgen paketten beriledi.

Azyq-túlikter «Gramad» saýda úıiniń dúkender jelisinde kúndelikti jáne demalyssyz saǵat 9:00-den keshki saǵat 18:00-ge deıin taratylady. Saýda úıi kepildendirilgen áleýmettik paketti tek qana @aspgramadbot telegram boty arqyly habarlaıdy. Bot arqyly azyq-túlik berý beketteriniń mekenjaılaryn jáne kúni men ýaqytyn bilýge bolady. Ol úshin balanyń JSN nómirin engizý qajet. Azyq-túlik sapasyna aryz-shaǵym túsken jaǵdaıda saýda úıi zatty aýystyrýǵa kepildik beredi.

Jalpy, ataýly áleýmettik kómek – bul memleketten ýaqytsha qarjylaı qoldaý. Azamattardyń jaǵdaıyn jaqsartyp, aıaqqa turyp ketý maqsatynda tólenedi. Turǵyndar muny jiti uǵynýy tıis.

Shartty aqshalaı kómek tabysy az jalǵyzilikti nemese jalǵyz turatyn eńbekke qabiletti nemese quramynda eńbekke qabiletti músheleri bar otbasylarǵa kórsetiledi. Jumysqa qabiletti músheleri jumyspen qamtýdyń belsendi sharalaryna qatysqan jaǵdaıda ǵana ataýly áleýmettik kómek beriledi.