Shymkent qalasyndaǵy juqpaly aýrýlar aýrýhanasynyń dárigerleri ókpesiniń 85 paıyzy zaqymdalǵan qart kisini aman alyp qaldy. Kompúterlik tomografıa nátıjesinde naýqasta eki jaqty pnevmonıa anyqtalǵan. Buǵan qosa PTR saraptamasy boıynsha egde jastaǵy azamatshada Covid-19 vırýsy bar ekeni belgili bolǵan.

Naqtyraq aıtsaq, 1952 jylǵy qala turǵyny Ulas Isaqqyzy aǵymdaǵy jyldyń 28-shilde kúni aýyr halde juqpaly aýrýlar aýrýhanasyna jedel járdem qyzmetimen jetkizilgen bolatyn. 3 tamyz kúni naýqastyń jaǵdaıy kúrt nasharlaǵan soń dárigerler jansaqtaý bólimine aýystyryp, jasandy tynys alý apparatyna qosady. Emdeý barysynda qart kisige reanımasıalyq jáne vırýsqa qarsy terapıalyq emder úzdiksiz júrgizildi. Araǵa bir aı salyp, naýqastyń jaǵdaıy jaqsarǵan soń dárigerler ony palalataǵa aýystyrǵan.

Dárigerdiń aıtýynsha, aılap jansaqtaý bóliminde jatqan naýqastyń sozylmaly aýrýlaryna baılanysty asqynýlar bolǵan. Degenmen emdeý jumystary oń nátıje kórsetip, 69 jastaǵy kisiniń densaýlyǵy jaqsarǵan.

– Zeınetkerge emdeý hattamasy boıynsha tolyq em júrgizildi. Qazir naýqastyń jaǵdaıy jaqsy. Búgin úıine shyǵardyq»- deıdi juqpaly aýrýlar ortalyǵynyń dárigeri Seıtalıev Nurlybek