Búgin qaladaǵy emhanalarda tumaýǵa qarsy vaksınalaý jumystary bastaldy. Bul týraly Shymkent qalalyq densaýlyq saqtaý basqarmasynyń basshysy Baqytjan Pozılov málimdedi. Basqarma basshysy qala ákimdiginiń Instagram paraqshasynda ótken tikeleı efırde atqarylǵan jumystardy qorytyndylap, turǵyndar saýalyna jaýap berdi.

Ekpe egý jumystary úshin bıyl qala turǵyndaryna 128 963 doza vaksına satyp alyndy. Buǵan qosa qosymsha 109 432 dozaǵa ótinish berilgen.

Sondaı-aq basqarma basshysy qaladaǵy epıdemıologıalyq jaǵdaıǵa toqtalyp ótti.

– Shymkent qalasy boıynsha ótken táýlikte KVI-diń 128 jaǵdaıy tirkeldi. Onyń ishinde belgileri bar - 101, belgileri joq - 27. İndet juqtyrǵan 73 adam ınfeksıalyq stasıonarǵa jatqyzylyp, 55 adam úı baqylaýyna alyndy. Shymkentte indetke shaldyqqandar kún saıyn azaıyp keledi. Sonyń dáleli, qaladaǵy provızorlyq stasıonarlardaǵy tósek-oryndardyń 50 paıyzdan astamy bosady. Naqtyraq aıtqanda, 4 350 tósek-orynnan 2 397-i qysqarǵan. Epıdemıologıalyq jaǵdaı turaqtalyp keledi, – dedi B. Pozılov.

Basqarma basshysyna tikeleı efır barysynda negizinen emhanadaǵy tekserýler, balalar arasyndaǵy ınfeksıalyq aýrýdyń taralýy men medısına qyzmetkerleriniń jalaqysy jóninde saýaldar joldandy.

Aıta keteıik, tumaýǵa qarsy vaksınanyń koronavırýs ınfeksıasyna múldem qatysy joq. Basqarma basshysy bul ımmýndaý jumystary maýsymdyq tumaýdy aldyn alý úshin jylda júrgiziletin profılaktıkalyq shara ekenin atap ótti.