Jetinshi shaqyrylymdaǵy Shymkent qalasy máslıhatynyń kezekti toǵyzynshy sesıasy ótti. Kún tártibinde jalpy 15 másele qaralyp, depýtattar tarapynan qoldaý tapty. Sesıany Shymkent qalasy máslıhatynyń hatshysy Bahadyr Narymbetov júrgizip otyrdy.

Jıynda aldymen «2021-2023 jyldarǵa arnalǵan Shymkent qalasynyń búdjeti týraly» máslıhat sheshimine ózgerister engizý máselesi talqyǵa tústi. Bul jóninde qalalyq ekonomıka jáne búdjettik josparlaý basqarmasynyń basshysy R.Múlkemanov baıandama jasady. Onyń aıtýynsha, densaýlyq saqtaý, bilim, áleýmettik qorǵaý, jol qurylysy, kóp qabatty turǵyn úılerdi kúrdeli jóndeý, áleýmettik mańyzy bar azyq-túlik taýarlarynyń baǵasyn turaqtandyrý, ındýstrıaldy aımaqtardy damytý, taǵy basqa salalarǵa qosymsha qarjy baǵyttaýǵa usynys engizilgen. Nátııjesinde qala búdjetiniń kólemi 481 mlrd 600 mln teńgeden, 490 mlrd 600 mln teńgege artatyn bolady. Qala búdjetin naqtylaý máselesi qalalyq máslıhattyń turaqty komısıalarynda, qoǵamdyq keńeste jan-jaqty talqylanǵan.

Sesıada 2021-2022 jylǵy jylý maýsymyna daıyndyq sharalary týraly Shymkent qalasynyń energetıka jáne ınfraqurylymdy damytý basqarmasynyń esebi tyńdaldy. Basqarma basshysy Boranbaı Býlatbekovtyń málimdeýinshe, búginde qala boıynsha 1945 turǵyn úıdiń 1847-i qysqy maýsymǵa daıyn. Bul – 95 paıyz kórsetkish. Atap aıtqanda, Abaı aýdanynda 394, Ál-Farabı aýdanynda 575, Eńbekshi aýdanynda 500, Qarataý aýdany boıynsha 378 úı daıyn.
Odan bólek, 482 búdjettik nysannyń 480-y jylytý maýsymyna daıyndaldy. Búdjettik mekemelerge 980 tonna suıyq otyn, 4,7 myń tonna kómir qajet.

Sondaı-aq, sesıa barysynda tórt aýdan ákimderi óńirlerdiń damý strategıasy boıynsha 2021 jyldyń 8 aıynda atqarylǵan jumystardy baıandady. Abaı aýdanynyń ákimi B. Parmanov, Ál-Farabı aýdanynyń ákimi R.Myńbaev, Eńbekshi aýdanynyń ákimi D. Esilbek jáne Qarataý aýdanynyń ákimi A. Áliqulov abattandyrý, ınjenerlik ınfraqurylym júıeleri, qysqy jylý maýsymyna daıyndyq barysy jóninen habardar etti.
Máslıhat depýtattary atalǵan sheshimderdi biraýyzdan qoldady.

Sonymen qatar, sesıada Shymkent qalasyndaǵy kóshi-qon prosesterin retteý qaǵıdalaryn bekitý, «Jergilikti memlekettik-jekeshelik áriptestik jobalarynyń tizbesin bekitý týraly» máslıhat sheshimine tolyqtyrý engizý máseleleri qoldaý tapty.