Búgin Almatydaǵy Abaı eskertkishi mańynda tirkelmegen Demokratıalyq partıa jaqtastary mıtıń ótkizýge jınaldy. Olar joǵary dárejeli shendilerdiń memlekettik til týraly aıtqandary men elektrondyq úkimet portalyn reseılik platformaǵa berý boıynsha jasalǵan memorandým ulttyq qaýipsizdikke qaýip tóndirip turǵanyn aıtyp, bılikke narazylyqtaryn bildirmek bolǵan.

Alaıda polısıa birneshe belsendini  mıtıńten buryn ustap alyp ketti. Olardyń qatarynda Abzal Dostıarov, Arýjan Dúısebaeva sekildi belsendilerdiń bary habarlandy.

Qazir bir top belsendiler qalalyq polısıa departamenti aldynda qamaýǵa alynǵandardy bosatýdy talap etip otyr. 

Arnaıy jasaq, Janbolat Mamaıdy da ustap alyp ketpekshi boldy, alaıda onyń jaqtastary ony qorshap ustap qaldy. 

Mıtıń orny retinde belgilengen alań qorshaýǵa alynyp, ınternet buǵattaldy.

Alańǵa kelgen ondaǵan belsendi plakattary men rýporyn polısıa tartyp alǵanyn jetkizip aıqaılap turdy.

Belsendiler AES salý, Qazaqstan azamattarynyń derek qoryn reseılik platformaǵa kóshirý, eldegi Qytaı nysandary, áleýmettik jelilerdi shekteý sekildi máselelerge narazylyqtaryn bildirdi.

Sondaı-aq belsendiler Nazarbaev rejıminiń bılikten ketýin talap etip, "Nazarbaev ketsin" dep urandatty.