Shymkent qalasynda jas rejıserlerge arnalǵan SHYMKENT NOMAD FILM FEST qysqametrajdy fılmder festıvli óz máresine jetti. «Jastar resýrstyq ortalynyń» uıymdastyrýymen ótken saltanatty jıyn el Táýelsizdiginiń 30 jyldyǵyna arnalady.
Marapattaý rásimine qatysqan Shymkent qalasy ákiminiń birinshi orynbasary Shyńǵys Muqan jas talanttardy quttyqtap, shyǵarmashylyq tabys tiledi.
– Baıqaýdyń maqsaty – qalamyzdaǵy kınoındýstrıa salasyna úlken mán berip, jas talanttarǵa qoldaý jasaý. Sonymen qatar festıválge qatysýshy daryndy jastardyń shyǵarmashylyǵyna qoldaý kórsetý arqyly múmkindik beretin úlken shyǵarmashylyq alań qurý. Júldeli oryn alǵan 4 fılmdi kórermendermen birge tamashaladyq. Jas rejıserlerdiń aıaq alysy jaman emes. Bıyl bul baıqaý Shymkentte besinshi ret uıymdastyrylyp otyr. Jastarymyz osyndaı qarqynda eńbektenip, izdene tússe qalamyzdan áli talaı myqty kınorejısserler shyǵatyny sózsiz. Osyndaı shaǵyn kınofestıvalder olardyń tanylyp, shyńdala túsýine jol ashady dep senemiz, - dedi qala ákiminiń birinshi orynbasary.
Osy jyldyń 12 tamyz -10 qyrkúıek aralyǵynda ótken baıqaýǵa qatysýǵa 30 úmitker nıet bildirip, qazylar alqasy sonyń ishinen 10 kınotýyndyny iriktep alǵan. Tanymal rejıser, «TALAS» film kınostýdıasynyń basshysy Serik Talasov, «Saıram-Órkenıet» BPU tóraǵasy Jadyra Tańatarova, Shymkent qalasy máslıhatynyń depýtaty Talǵat Baltabaev, akter Marat Dostaev, prodúser Baqbergen Asanbaev sarapshylar arasynan tabyldy.
Qazylar alqasy músheleriniń aıtýynsha, baıqaý qatysýshylary jastyǵyna qaramastan qoǵamdaǵy kókeıtesti máselelerdi fılmderine arqaý ete alǵan. Olar jas rejıserlerdiń eńbeginde árbir beınesújettiń taqyryptyq ıdeıasynyń ereksheligine jáne eńbektiń janrlyq talaptarǵa saı bolýyna aıryqsha mán bergenderin aıtady.
Baıqaý qorytyndysy boıynsha úshinshi oryndy Ersultan Tileýovtyń «Tańdaý» týyndysy qorytyndylady. Ekinshi oryn Dmıtrıı Vladımırovıchtiń enshisinde («Ýspeh. Jetistik» fılmi). Al birinshi oryn «Sadaqa» fılminiń rejıseri Bolat Qojahmetke buıyrdy. Bas júldege «Áke» fılminiń rejıseri Erdaýlet Alıbekov ıe boldy.
Aıta ketsek, bul festıvál buǵan deıin «Samǵaý» degen ataýmen Shymkentte 5 jyl qatarynan ótkizilgen bolatyn. Biraq eldegi epıdahaýaldyń kúrdelenýine baılanysty ýaqytsha toqtaǵanymen bıyl «Shymkent nomad film fest» qysqametrajdy fılmder festıvali ataýymen qaıta bastaý aldy.
