Shymkent qalasy ákiminiń orynbasary Erǵalı Bilisbekov azamattardy jeke máseleleri boıynsha onlaın qabyldady. Onda azamattardyń basym bóliginde ózekti bolyp tabylatyn turǵyn úı máselesi qaraldy. Erǵalı Dáýletbekuly árbir azamattyń ótinishin muqıat tyńdap, páterlerge zań aıasynda qol jetkizý joldaryn túsindirdi.
Búgingi tańda Shymkentte 46 008 azamat turǵyn úı kezeginde tur. Onyń ishinde jetim jáne ata-anasynyń qamqorlyǵynsyz qalǵan balalar sanaty boıynsha - 1 749, kópbalaly otbasylar - 8 538, halyqtyń áleýmettik jaǵynan álsiz toby - 15 759, memlekettik qyzmetshiler, búdjettik uıym jáne áskerı qyzmetshiler - 19 935, jalǵyz turǵyn úıi apatty jaǵdaıda dep tanylǵan 27 adam bar ekenin aıtqan ol, baspana tek kezek rettiligimen ǵana beriletindigin túsindirdi. Kezek retin «Egov.kz» portaly arqyly kórip otyra alady. Bul rette Shymkentte bıyl mıllıon sharshy metr turǵyn úıdiń qurylysy júrip jatqanyn túsindirdi.
Odan bólek, baspanaǵa muqtaj azamattardy qoldaý maqsatynda bıyl jergilikti búdjet esebinen turǵyn úı serıtıfıkatyna 500 mıllıon teńge bólindi. Qaıtarymsyz negizde bastapqy jarnaǵa 1 mıllıon teńgeden beriledi. Atalǵan sertıfıkatty búginde 132 azamat alyp úlgerdi. Turǵyn úı sertıfıkatyna ótinimder 1 qazannan bastap qaıta «www.kezekte.kz» saıty arqyly qabyldanady.
Jalpy osy jyly 976 azamatty satyp alý quqyǵynsyz arendalyq pátermen qamtamasyz etý kózdelip, 8 aıda 682-si oryndaldy. Onyń ishinde 300 jaldamaly baspana jumys istep júrgen jastarǵa, 25 páter jetim balalarǵa, 176 páter kópbalaly otbasylarǵa, 181 páter halyqtyń áleýmettik jaǵynan álsiz tobyna berildi. Qalǵan 294 páter turǵyn úılerdiń qurylysy aıaqtalýyna qaraı jyl sońyna deıin úlestiriletin bolady.
Qala ákiminiń orynbasary arendalyq páterler kezek arqyly kópbalaly otbasylarǵa, halyqtyń áleýmettik jaǵynan álsiz toptaryna jáne jumys isteıtin jastarǵa qarastyrylǵanyn, al búdjettik uıym qyzmetkerlerine «Nurly jer» memlekettik turǵyn úı baǵdarlamasy aıasyndaǵy nesıelik baǵdarlamalar usynylyp jatqanyn aıqyndap aıtty.
Budan bólek, sala jetekshisi retinde jumyspen qamtýǵa qatysty qozǵalǵan máselelerdi sheshý úshin basqarma basshylaryna naqty tapsyrmalar júktedi.
