Búgin Shymkent qalasynyń ákimi Murat Áıtenovtyń tóraǵalyǵymen ótken jumys jıynynda qalanyń jylý berý maýsymyna daıyndyǵy qaraldy.
Qalalyq energetıka jáne ınfraqurylymdy damytý basqarmasynyń basshysy B.Býlatbekov bergen málimetke sáıkes, ortalyqtandyrylǵan jylý júıesine qosylǵan 1945 kópqabatty turǵyn úılerdiń 98 paıyzy jylytý maýsymyna daıyn. Qalǵan turǵyn úılerde daıyndyq jumystary qazan aıyna deıin tolyq aıaqtalady.
Áleýmettik nysandardyń daıyndyǵy 99 paıyzǵa jetti. Olarǵa qajetti 4,7 myń tonna kómir, 980 tonna suıyq otyn tolyq tasymaldanǵan.Ortalyqtandyrylǵan jylý qazandyǵyna qosylmaǵan eldimeken turǵyndary jylytý maýsymynda 77,6 myń tonna kómirdi qajet etedi. Qazirgi ýaqytta qoımada 62 myń tonna kómir bar. Qoımalardaǵy kómir qory qatty otyn qajettiliginiń 80 paıyzyn qamtıdy.
Basqarma basshysy ınfraqurylymdyq júıelerdiń de daıyndyǵyn jekeleı baıandady. «3-Energoortalyq» AQ-nyń negizgi jáne qosalqy qondyrǵylarynyń qysqy maýsymǵa daıyndyǵy 96%-dy quraıdy. 12 qazandyq pen 17 sorǵy stansıalarynyń daıyndyǵy 100 paıyzdyq kórstkishke jetken.
Jıyn barysynda qala ákimi jylý maýsymyna daıyndyq jumystaryn tıanaqty zerdeleýge 10 qazanǵa deıin ýaqyt bar ekendigin aıtyp, kemshilikter bolsa tez arada retteýdi tapsyrdy. Jyldaǵy dástúr boıynsha 100 paıyzdyq daıyndyq jóninde esep berilip, kóp uzamaı kemshilikter anyqtalar bolsa jaýapty azamattarǵa shara kóriletinin atap ótti. Birde bir jylý qazandyǵy isten shyqpaýy kerektigin nazarǵa aldy. Densaýlyq saqtaý, bilim berý uıymdarynyń daıyndyǵyn erekshe baqylaýdy ustaýdy júktedi. Balabaqsha tárbıelenýshileriniń, onyń ishinde jekemenshik balabaqshalarǵa baratyn balalar densaýlyǵy kútimin qadaǵalaýdy tapsyrdy.
Qysqy maýsymda kósheler men aıaqjoldardy qardan tazalaý boıynsha júıeli jumystar bolýy kerektigin aıtqan qala basshysy, turǵyndar men balalar úshin tańǵy mezgilde qardan tazalanǵan kóshelerde júretindeı múmkindikter jasalýy tıis dedi. Bul baǵytta qar jaýǵan kúnderi 2-3 saǵat ishinde qala kósheleriniń 70 paıyzy qardan tazartylýy kerek degen normatıvti ustanýdy júktedi. Kóshelerdi tazalaýǵa jumyldyrylǵan tehnıka ár aýdannyń eldi mekenderine tıesili bolyp, bir aýdannyń tehnıkasy sol aýdannyń eldi mekenderine qyzmet kórsetýi kerektigin eskertti. «Júktelgen mindetterdi tez ári sapaly oryndaýy úshin tazalyq kompanıalary qysqy maýsymda jetispeıtin tehnıkalaryn úshinshi taraptan ýaqytsha jaldaý algorıtimi qazirden daıyn bolýy kerek. Kóktaıǵaqta jol betine sebiletin ınertti materıaldar elekten ótkizilýi tıis, qum arasyndaǵy qıyrshyq tas avtokólikterge zaqym keltirmeýi tıis»,- dedi Murat Dúısenbekuly.
Jıydy qorytyndylaǵan shahar basshysy sala jetekshilerine berilgen tapsyrmalar boıynsha naqty jumystar atqarýdy júktep, bul máseleler jaqyn kúnderi taǵy da pysyqtalatynyn aıtty.
