Shymkent qalasy ákiminiń orynbasary Erǵalı Bilisbekov kezekti ret turǵyndardy jeke máseleleri boıynsha onlaın qabyldady.
Qabyldaý barysynda turǵyn úı, áleýmettik kómek jáne sot oryndaýshysy tarapynan esep-shoty buǵattalǵan turǵyndardyń ótinishteri qarastyryldy. Osy máseleniń mán-jaıyn anyqtap, zań júzinde sheshý maqsatynda Shymkent qalasy ádilet departamentiniń mamany da qatysty. Qabyldaý barysynda elden shyǵýǵa tyıym salynǵan boryshkerdiń máselesi sheshimin tapty.
Qala ákiminiń orynbasary ár turǵyndy jeke tyńdap, baspana máselesin sheshý joldaryn qarastyrdy. Turǵyn úıge muqtaj jáne ata-anasynyń qamqorlyǵynsyz qalǵan eki jas turǵyn qabyldaý barysynda turǵyn úı sertıfıkaty týraly alǵash esitip otyrǵanyn jetkizdi. Qala ákimdiginiń bastapqy jarna retinde 1 mıllıon teńgeden qoldaýyna qyzyǵýshylyq tanytyp, aldaǵy ýaqytta ıpotekalyq baspanany qarastyrýǵa bel býmaq. Óıtkeni, qalalyq turǵyn úı basqarmasynyń málimetinshe ol jastarǵa sanattary boıynsha, zeınetaqy aýdarymdary men tólem qabilettilikterine sáıkes nesıelik baspanaǵa qol jetkizýge bolady.
Erǵalı Dáýletbekuly sala mamandaryna Shymkent qalasy boıynsha jalpy kezekte turǵan turǵyn úıge muqtaj jáne ata-ana qamqorlyǵynsyz qalǵan jastar jóninde taldaý jasaýdy tapsyrdy. Bul sanattaǵy azamattardyń ózekti máselesin egjeı-tegjeıli qarastyryp, naqty sheshimder qabyldaý qajet ekendigin basa aıtty.
