Shymkent qalasy ákiminiń orynbasary Erǵalı Bilisbekov «Otyrar» telearnasynyń «Halyq pen bılik» baǵdarlamasyna qatysyp, tikeleı efır arqyly turǵyndardyń suraqtaryna jaýap berdi.

Turǵyndar suraqtardy telearnanyń baılanys nómiri men «Whats Aap» jáne «Instagram» jelileri arqyly joldady. Efır barysynda turǵyndardan túsken ózekti máselelerdiń deni áleýmettik sala men qaladaǵy tozyǵy jetken úılerge qatysty boldy. Turǵyndar tozyǵy jetken úılerdiń aldaǵy kúıine alańdaýly.

–Tozyǵy jetken úıler qazirgi tańda ózekti másele. Olardy súrip, turǵyndaryn kóshirý boıynsha 2020-2025 jyldarǵa arnalǵan «Nurly jer» memlekettik baǵdarlamasy aıasynda Shymkent qalasynyń turǵyn úı qoryn renovasıalaý baǵdarlamasy qabyldanǵan. Alaıda, kóp adamdar úırengen jerinen kóshýge kelise bermeıdi. Sol sebepti ortaq sheshim qabyldap, halyqtyń qamy úshin qurylys kezinde turǵyndardy ýaqytsha baspanamen qamtamasyz etý nemese ornyna teń pátermen qamtý sharalary qarastyrylýda, -dedi Erǵalı Dáýletbekuly.

Qazirgi tańda, qalada 2 296 kóppáterli turǵyn úı bar. Onyń ishinde ótken ǵasyrdyń 50-60-shy jyldaryna deıin salynǵan 107 úı tehnıkalyq zertteý qorytyndysy negizinde tozyǵy jetken kóppáterli turǵyn úı retinde súrýge usynylǵan. E.Bilisbekovtyń sózinshe, búginde arnaıy baǵdarlama aıasynda turǵyndar arasynda túsindirme jumystary júrgizilip, «Shymkent» ÁKK» AQ tarapynan bul iske ınvestorlardy tartý jumystary da júrgizilýde.

Bir saǵatqa sozylǵan efırde ákim orynbasary ózi jetekshilik etetin turǵyn úı, jumyspen qamtý jáne áleýmettik qorǵaý, ekonomıka jáne búdjettik josparlaý basqarmalarynyń jumysyn qysqasha baıandap, kórermenderdiń suraqtaryna tolyq jaýap berýge tyrysty.

Sonymen qatar, ákim orynbasary azamattardy jeke máseleleri boıynsha onlaın qabyldady.

Aıta keteıik, Shymkent qalasy ákiminiń orynbasary Erǵalı Bilisbekov turǵyndardy jeke qabyldaýy aldyn-ala jazylý boıynsha, aptanyń beısenbi jáne juma kúnderi onlaın túrde qabyldaıdy.