Shymkentte qalany jasyl jelekke aınaldyrý jáne kógaldandyrý jumystary udaıy basty nazarda. Búgingi tańda megapolıste 8 saıabaq, 39 gúlzar bar. Olardyń barlyǵyna arnaıy qyzmetkerler kún saıyn erekshe kútim júrgizedi. Shymkent qalalyq jaıly ortany damytý basqarmasynyń basshysy Ǵalymjan Ilásov 30 jylda ekologıa baǵytynda talaı is tyndyrylǵanyn, degenmen áli de atqarylatyn sharýa kóp ekenin aıtady.

Onyń aıtýynsha, Eýropa elderinde ár adam basyna 24 sharshy metr jasyl jelekten keledi eken. Al elimizdegi Almatyda – 13 sharshy metr, Shymkentte 5-6 sharshy metrdi quraıdy. Jalpy standart boıynsha jan basyna shaqqanda jasyl jelek 10 sharshy metrden kem bolmaýy tıis. Sondyqtan Shymkent qalasynyń ákimi Murat Áıtenovtiń hattamalyq tapsyrmasyna jáne shahardy kógaldandyrý men kóriktendirýge baılanysty jasalǵan arnaıy baǵdarlamaǵa sáıkes 2025 jylǵa qaraı qosymsha 23 gúlzar, 4 saıabaq salynady.

«Qaladan 23 jer aýmaǵynan gúlzarlar salý josparlanǵan. Ol aımaqtarda jyl saıyn gúlzarlar salynady. Kelesi jylǵa 6 aýmaqta gúlzar qurylysyn júrgizý josparda tur. Shymsıtı shaǵynaýdanynan 47 gektar aýmaqqa saıabaq salynady. Ol kólemi jaǵynan shahardaǵy dendrosaıabaqtan keıingi ekinshi úlken park bolady. Bıyl «Fırkan sıtı» saýda–oıyn-saýyq ortalyǵynyń mańyndaǵy burynǵy qoqys polıgonynyń ornynan salynyp jatqan jańa saıabaqtyń qurylysy aıaqtalyp, paıdalanýǵa beriledi. Jáne kelesi jyly 12-shaǵynaýdanda 1.6 gektar aýmaqty quraıtyn taǵy bir saıabaqtyń qurylysy aıaqtalady»,-dedi basqarma basshysy.