Memleket basshysy Qasym-Jomart Toqaev aldaǵy bes jylda elimizdiń orman qorynda 2 mıllıardtan astam, al eldi mekenderde 15 mıllıonnan astam aǵash otyrǵyzýdy aıtqan bolatyn. Osy baǵytta Shymkent qalasynyń jasyl alqap kólemin ulǵaıtý maqsaty qoıyldy. Josparlanǵan is-sharalardy júzege asýyrý úshin aǵash-buta kóshetterin ósirýge arnalǵan orman tuqymbaqtaryn damytý qajet.

Shymkent qalasynyń qalalyq jaıly ortany damytý basqarmasyna qarasty «Jasyl beldeý» komýnaldyq memlekettik mekemesiniń teńgerimindegi tuqymbaq aýmaǵy jyl sońyna deıin 2,8 gektardan 8,2 gektarǵa ulǵaıtylatyn bolady. Sonymen birge, atalǵan mekemege memlekettik orman qorynan 752,8 gektar jer ýchaskesi bekitilip berildi.

Tuqymbaq jer ýchaskelerinde qalanyń jasyl beldeý kólemin ulǵaıtý men qala kóshelerin, óndiristik nysandaryn kógaldandyrýǵa qajetti aǵash-buta kóshetterin ósirý kózdelýde. Birinshi kezekte tuqymbaqtyń 8,2 gektaryna 19 túrli aǵash-buta tuqymdary óńdep sebiledi jáne 1,7 gektar jerge ártúrli tal, aǵash, butalardyń 140 myń dana qalamshasy otyrǵyzylady. Joba boıynsha ósirilip jatqan aǵash-buta kóshetteriniń sany 1 mıllıon 770 myń danaǵa jetýi tıis.

Ótken jyly atalǵan tuqymbaqtaǵy 2,8 gektar jerge 18 túrli aǵash-butanyń 86 220 aǵash tuqymdary egildi. Atap aıtqanda qaraǵash, úıeńki, emen, talshyn, órik, badam, qaramala, shaǵan jáne shabdaly, jıde, almurt, jaıarsha, aılant, sakýra, katalpa, terek, búıirgen, sámbi tal.

Sonymen qatar mekeme tarapynan aǵymdaǵy jyly tuqym jınaý jumystary júrgizilip. Nátıjesinde jalpy 1863 kg (1500 kg – emen, 3 kg – alma, 30 kg – órik, 50 kg – qara órik , 280 kg – kashtan) aǵashtarynyń tuqymdary jınaldy.