Shymkent qalasynda OQMÝ jáne M.H.Dýlatı atyndaǵy №8 mamandandyrylǵan mektep janynan demeýshiler esebinen eki «aqyldy» aıaldama paıdalanýǵa berildi.

Jańa aıaldamada turǵyndardyń jolaýshylardyń yńǵaılylyǵy úshin tegin wi-fi, smartfon qýattaǵysh kózderi, kondısıoner, qalanyń kartasy jáne marshrýt baǵyttary kórsetilgen elektrondy taqtaısha, beınebaqylaý kameralary ornatylǵan.

Jańa aıaldamanyń ashylýyna qatysqan qala ákiminiń orynbasary Maqsut Isahov mundaı jobalar qala tirishiligine kerek ekenin jetkizdi.

–Investor salyp otyrǵan bir aıaldamanyń quny 8 mln. teńgeni quraıdy. Ókinishke qaraı, qalalyq búdjet esebinen mundaı qarjyǵa aıaldamalar sala almaımyz, baǵasy óte qymbat. Aqyldy aıaldamanyń eń úlken artyqshylyǵy – jazda salqyn, qysta jyly. Taǵy bir tıimdiligi elektr júıesiniń shyǵyndary men kútip ustaý, tazalyq máseleleri de ınvestordyń jaýapkershiliginde bolady,-dedi qala ákiminiń orynbasary.

Aıaldamalardy qaýipsiz etý ári múlkin saqtaý maqsatynda beınebaqylaý kameralary qalalyq Polısıa departamentiniń shuǵyl ortalyǵyna qosylǵan.

Aıta ketsek, jyl sońyna deıin jolaýshylardyń haby sanalatyn 8 núktege sońǵy úlgidegi aqyldy aıaldamalar salý josparlanyp otyr.