Reseı Prezıdenti Vladımır Pýtınniń Sırıaǵa áýe shabýylyn jasaý týraly sheshimi birazdy tańqaldyrǵan bolatyn. Bul týraly «Qamshy» portaly globalpost.com-ǵa silteme jasaı otyryp habarlaıdy. Reseılik basshynyń shyǵys kórshisine qatysty jospary kópshilik úshin áli kúnge deıin jumbaq bolyp otyr. Kremldik úkimettiń nazary «Islamdyq memleket» uıymyn eńserý ekeni sózben aıtylsa da, ispen dáleldengen joq. Reseılik úkimettiń negizgi maqsaty – ISIS-pen kúres júrgizý emes, jazyqsyzdarǵa shabýyl jasap, Bashara al-Asadtyń bıligin qoldaý deıdi kóptegen synshylar.
Reseıdiń Qorǵanys mınıstrligi Sırıaǵa baǵyttalǵan áskerı ushaqtary maqsatty qarsylastardy joıǵanyn málimdese, sırıalyq opozısıalyq toptar múldem qarama-qaıshy pikirdi alǵa tartyp otyr. Olar Reseıdiń qarapaıym halyqqa tıgizgen zardabyna, kinásiz jandardyń ólimine narazy ekenin bildirýde.
Biraq, Reseı İİM-niń bas hatshysy Marıa Zaharova batystyq jáne ózge elderdiń buqaralyq aqparat quraldaryn Sırıadaǵy jaǵdaıǵa baılanysty halyqty dezınformasıalap jatqandary úshin kiná taǵýda.
Esesine Orys Pravoslavıelik Shirkeýiniń ókili Vsevolod Chaplın óńirlik BAQ-qa bergen suhbatynda batys elderi týraly dáneńe degen joq, bar bolǵany otandastarynyń bul qareketin qoldap: «Terorızmge qarsy kúres qasıetti soǵys sanalady. Bizdiń memleketimiz, osy rette belsendilik tanytyp otyr» degen bolatyn. Bul málimdemesin obektıvtilikke balaý aǵattyq bolar, sebebi shirkeýdiń Kremlmen tyǵyz baılanysy bar, onyń ústine mundaı saıası qoldaý tanytyp otyrǵany birinshi ret emes.
Saıası elıtanyń basym kópshiligi Kremldiń nusqaýymen sheshim qabyldaýǵa daǵdylanǵan. Bul Reseı úshin qalypty jaǵdaı. Aıta ketsek, sheshendik kóshbasshy Ramzan Kadyrov ta osy jaǵdaıdyń aıqyn dáleli.
«Reseılik áýe operasıasynyń jalǵyz oryndalyp jatqany, árıne, ókinishti. Biraq, Sırıadaǵy ISIS-pen kúres júrgizip jatqan áskerge járdem-kúsh qajet bolsa, biz alǵashqylardyń biri bolyp kezekke turamyz. Bizdiń áskerı daıyndyq nómiri birinshi dep atalýǵa laıyq», - dep pikir bildirdi, mazasyz aımaqtyń kóshbasshysy.
Aǵymdaǵy aptada jasalǵan saýalnamada Reseı halqynyń 2/3 bóligi Sırıaǵa ásker jiberýge qarsylyq bildirgeni anyqtaldy. Halyqtyń kópshiligi 1979 jyldan bastaý alǵan Aýǵan elimen 10 jylǵa sozylǵan qandy shaıqasta 15 myń keńestik sarbazdan aıyrylǵanyn ókinishpen eske alady. Reseılikter ol soǵystyń komýnıstik tártipke degen úlken halyqtyq agresıa týdyryp ketkenimen bólisti.
Pýtın jáne ózge de resmı tulǵalardyń aıtýynsha, qurlyqtaǵy ásker Sırıalyq josparǵa enbeıtini jóninde málimdegen bolatyn. Biraq, úkimettiń ýádesine baılanysty búginde kúmán bildiretinder de az emes kórinedi.
Nazgúl Nazar
