Táýelsizdiktiń 30 jyldyǵy jáne Stýdentter kúni men «Juldyzdy 30 kún» jobasy aıasynda Shymkenttegi ındýstrıalyq-tehnıkalyq kolejinde qaladaǵy arnaýly oqý oryndary stýdentteriniń «Bilimdi jas – Qazaqstannyń bolashaǵy» atty festıvali ótti.

Merekelik is-sharada arnaıy kórme uıymdastyryldy. Onda ár kolej kásiptik mamandyǵyna qaraı stýdentter qolymen jasalǵan buıymdardy kelýshiler nazaryna usyndy. Sondaı-aq festıvál barysynda shákirtter arasynda pikirtalas saıysy ótip, stýdentter parlamentarıasy uıymdastyryldy.

– Pandemıaǵa baılanysty kolej shákirtteri konserttik is-sharalarǵa qatysa almaı qalǵan edi. Karantındik talaptardyń jeńildeýiniń arqasynda kópten beri endi oflaın rejımde festıvál uıymdastyryp jatyrmyz. Buǵan stýdentterdiń barlyǵy dán rıza, qýanyshtarynda shek joq. İs-sharalardyń barlyǵyna belsene qatysýda. Festıváldiń basty maqsaty- Táýelsizdiktiń 30 jyldyǵyn atap ótý bolsa, ekinshi jaǵynan osyndaı merekelik is-shara arqyly arnaýly oqý oryndarymen baılanys nyǵaıyp, ortaq máseleler ortaǵa salynyp ári stýdentter ózara tanysýǵa, tájirıbe almasýǵa zor múmkindik alady. Sonymen birge Ózin-ózi taný páni boıynsha bizdiń bilim oshaǵy respýblıkada pılottyq jobaǵa kirgen. Osy festıválde sonyń aıasynda vebınar ótkizildi. Egemendikti eńseli etý jolynda kásiptik kolejderdiń jumysshy mamandar daıarlaýda qosar úlesi óte zor. Memleket tarapynan da arnaýly oqý oryndaryna kórsetiletin qoldaý sharalary jyldan-jylǵa ulǵaıtyp keledi. Sondyqtan keleshekte kásiptik mamandyqtar oqytýda kolejderdiń ataq-abyroıy odan saıyn artady degen úmittemin, – dedi ındýstrıalyq-tehnıkalyq kolej dırektory, ekonomıka ǵylymdarynyń doktory, profesor Tilek Isahmetov.

Kolejder arasynda ótip jatqan festıvál sońy ónerli stýdent jastardan quralǵan kórkemónerpazdar tobynyń merekelik konsertimen aıaqtaldy.

Ánýar JUMASHBAEV