Mańǵystaý oblysy Jańaózen qalasynyń turǵyndary bılikke beıneúndeý joldap, gaz baǵasyn arzandatýdy talap etip narazylyqqy shyqty. Bul týraly Lada basylymy habarlady. 

Jańaózendikterdiń aıtýynsha, 2022 jyldyń 1 qańtarynan bastap "kógildir" otyn baǵasy kúrt – 120 teńgege deıin ósken.

Sol sebepti, búgin Jańaózenniń júzdegen turǵyny kóshege shyǵyp, vıdeoúndeý joldady. Turǵyndar eldegi eń tómengi jalaqyny eskerip, gaz baǵasyn 60 teńgege deıin túsirýdi talap etti. Sondaı-aq olar Mańǵystaý oblysynda gaz únemi bolǵanyn qalaıdy.

Narazy jurttyń aldyna qala ákiminiń mindetin atqarýshy Ǵalym Baıjanov, ákim orynbasary Jańabaı Aımaǵambetov jáne quqyq qorǵaý organdary ókilderi shyqqan.

– Olarǵa suıytylǵan gazdy satý boıynsha istiń mán-jaıy túsindirildi jáne "Beıbit jınalystardy uıymdastyrý týraly" QR Zańyna, atap aıtqanda, olardyń is-áreketteriniń zańsyz ekeni týraly túsinikteme berildi. Óıtkeni, olar jınalys ótkizilgenge deıin bes jumys kúni buryn jergilikti atqarýshy organdy habardar etýi qajet. Qala ákimdiginiń ókilderi jınalǵandarǵa óz talaptaryn jazbasha túrde baıandaýdy usynyldy, - dep málimdedi basqarma ókili.

Eske salsaq, Qazaqstanda bıyldan bastap eń tómengi jalaqy 60 myń teńgeni quraıdy.