Premer-mınıstr Asqar Mamınniń ókimimen Mańǵystaý oblysyndaǵy áleýmettik-ekonomıkalyq jaǵdaıdy qarastyrý úshin Úkimettik komısıa quryldy. Bul týraly premer-mınıstrdiń resmı aqparattyq resýrsy málim etti.

Basylym málimetinshe, Úkimet suıytylǵan munaı gazynyń baǵasyn retteý boıynsha sharalar toptamasyn iske asyrady.

Sondaı-aq básekelestikti qorǵaý jáne damytý agenttigi AJQS ıelerine qatysty baǵalyq sóz baılasý boıynsha tergeý bastalǵanyn, qazirgi ýaqytta Mańǵystaý oblysynyń AJQS ıeleri bıznestiń áleýmettik jaýapkershiligi aıasynda bastamashylyq tártippen gaz qunyn lıtrine 120 teńgeden 85-90 teńgege deıin tómendetý týraly sheshim qabyldaǵany habarlandy.

"Baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etýdiń jáne gaz baǵasynyń alypsatarlyq kóterilýine jol bermeýdiń júıeli sharalary júzege asyrylatyn bolady. Úkimet, Mańǵystaý oblysynyń ákimdigi prokýratýra organdarymen birlesip, qoǵamdyq tártipti buzýmen baılanysty bolǵan oqıǵany quqyqtyq baǵalaý boıynsha sharalar qabyldaıdy" delingen aqparattyq habarlamada.

Mańǵystaý oblysy Jańaózen qalasynda kesheli beri gaz baǵasy qymbattaýyna baılanysty narazylyq aksıalary ótip jatyr. Qala aýmaǵynda ınternet pen uıaly baılanys istemeıdi. Áleýmettik jeli arqyly túrli aqparat jetip jatyr.

Sońǵy aqparattarda qala ishinde qarýly kúzet kúsheıgeni, narazy azamattardy oblystyń ózge de aýdandary qoldap kóshege, alańǵa shyǵyp jatqany aıtylady.

Oqı otyryńyz

 ♦ Aqtaý, Aqtóbede adamdar alańǵa shyqty. Munaıshylar jumysyn toqtatty