Prezıdent Qasym-Jomart Toqaev Nur-Sultan qalasynda da tótenshe jaǵdaı engizý týraly jarlyqqa qol qoıdy. Bul týraly  Aqordanyń resmı saıty habarlady.

Jarlyq mátininiń tolyq nustaqy tómendegideı:

"Nur-Sultan qalasy turǵyndarynyń qaýipsizdigin qamtamasyz etý maqsatynda Qazaqstan Respýblıkasy Konstıtýsıasynyń 44-baby 16-tarmaqshasyna, "Tótenshe jaǵdaı týraly" Qazaqstan Respýblıkasy zańynyń 4, 5, 6-baptaryna sáıkes qaýly etemin:

1. Azamattardyń mańyzdy jáne tikeleı qaýipsizdigine baılanysty qoǵamdyq qaýipsizdikti qamtamasyz etý, zańdylyq pen quqyqtyq tártipti qalpyna keltirý, azamattardyń quqyqtary men bostandyqtaryn qorǵaý maqsatynda 2022 jylǵy 5 qańtardaǵy 16 saǵat 00 mınýt pen 2022 jylǵy 19 qańtardaǵy 00 saǵat 00 mınýt merzimi kezeńinde Nur-Sultan qalasynyń shekaralarynda tótenshe jaǵdaı engizilsin. 

2. Nur-Sultan qalasynda tótenshe jaǵdaıdyń kúshinde bolýy kezeńinde 23 saǵat 00 mınýttan 7 saǵat 00 mınýtqa deıin komendanttyq saǵat engizilsin.

3. Tótenshe jaǵdaıdyń kezeńinde Nur-Sultan qalasynyń komendatýrasy qurylyp, oǵan "Tótenshe jaǵdaı týraly" Qazaqstan Respýblıkasynyń Zańymen kózdelgen ókilettikter berilsin. Nur-Sultan qalasynyń komendanty bolyp Nur-Sultan qalasy Polısıa departamentiniń bastyǵy Erjan Saparbekuly Sádenov taǵaıyndalsyn.

4. Tótenshe jaǵdaıdyń kúshinde bolýy kezeńinde mynadaı sharalar men ýaqytsha shekteýler belgilensin: 

1) qoǵamdyq tártiptiń saqtalýy, asa mańyzdy memlekettik jáne strategıalyq obektilerdiń, sondaı-aq halyqtyń tynys-tirshiligin jáne kólik qyzmetiniń jumys isteýin qamtamasyz etetin obektilerdiń kúzetilýi kúsheıtilsin;

2) Nur-Sultan qalasynda júrip-turý, onyń ishinde kólik quraldary qozǵalysynyń erkindigine shekteýler belgilesin;

3) jeke tulǵalardyń jeke basyn kýálandyratyn qujattardy tekserý, olardy jeke tekserý, olardyń zattaryn, kólik quraldaryn tekserý qamtamasyz etilsin;

4) Nur-Sultan qalasyna kirý, sondaı-aq odan shyǵý shektelsin;

5) beıbit jınalystardy, oıyn-saýyq, sporttyq jáne basqa da buqaralyq is-sharalardy uıymdastyrýǵa jáne ótkizýge tyıym salynsyn; 

6) ereýilderge jáne zańdy tulǵalardyń qyzmetin toqtata turýdyń nemese toqtatýdyń ózge de ádisterine tyıym salynsyn;

7) qarý, oq-dári, jarylǵysh zattar, arnaýly quraldar, ýly zattar satýǵa tyıym salynsyn, dári-dármektiń, esirtki zattardyń, psıhotroptyq zattardyń, prekýrsorlardyń, sondaı-aq etıl spırtiniń, alkogól ónimderiniń aınalymyna erekshe rejım belgilensin;

8) jeke tulǵalardan qarý men oq-dárini, ýly zattardy ýaqytsha alyp qoıý, al zańdy tulǵalardan qarýǵa, oq-dárige jáne ýly zattarǵa qosa áskerı jáne jaýyngerlik oqý tehnıkasyn, jarylǵysh jáne radıoaktıvti zattardy ýaqytsha alyp qoıý qamtamasyz etilsin.

5. Tótenshe jaǵdaıdyń rejımi kezinde qoldanylatyn sharalardyń iske asyrylýyna jaýapty bolyp Nur-Sultan qalasynyń komendatýrasy, Qazaqstan Respýblıkasynyń İshki ister mınıstrligi, Qazaqstan Respýblıkasynyń Ulttyq qaýipsizdik komıteti, Qazaqstan Respýblıkasynyń Qorǵanys mınıstrligi, Qazaqstan Respýblıkasynyń Tótenshe jaǵdaılar mınıstrligi belgilensin.

6. Qazaqstan Respýblıkasynyń Bas Prokýrory osy jarlyqta belgilengen sharalar men ýaqytsha shekteýlerdi iske asyrý kezinde zańdylyqtyń saqtalýyn qamtamasyz etsin. 

7. Qazaqstan Respýblıkasynyń úkimeti tótenshe jaǵdaı rejımin qamtamasyz etý úshin Qazaqstan Respýblıkasy úkimetiniń rezervinen qajetti qarajatty bólsin" delingen qujat mátininde. 

Jarlyq qol qoıylǵan kúninen bastap qoldanysqa engiziledi.