Prezıdent Q.Toqaev eldegi halyq narazylyǵynan keıingi tártipsizdikter kezinde jasalǵan túrli zańsyzdyqtarǵa qatysty bas prokýratýraǵa tapsyrma berip, kúdiktilerdiń kinási qandaı dárejede ekenin anyqtaýdy júktegen. Jaýaptylyqty aýyrlatatyn mán-jaı bolmasa, jazany jeńildetý úshin shara qabyldaǵan jón ekenin aıtqan. Arada bir apta ótti. Alaıda jazany jeńildetý bylaı tursyn, tergeý ızolátorynda kúdiktilerdi azaptaý, alańǵa beıbit shyqqan adamdardan "qylmysker jasaý" áreketteri tyıylar emes.
Tipti máselege álemdik qaýymdastyqtar nazar aýdaryp, búgin Eýro parlament Qazaqstandaǵy adam quqyǵynyń óreskel buzylyp jatqanyn qatań synǵa alyp, Qazaqstannyń joǵary laýazymdy tulǵalaryna sanksıa salýǵa shaqyrdy.
Narazylyq aksıalaryna qatysqany úshin qamalyp, polısıa qyzmetkerleri tarapynan azaptalyp jatqan adamdar jaıly kúnde túrli medıa jazyp, jýrnalıser, quqyqqorǵaýshylar, belsendiler áleýmettik jelide dabyl qaǵyp jatyr.
Máselen, quqyqqorǵaýshy Shynqýat Baıjanov Almaty qalasydaǵy 18 tergeý ızolátorynda bolyp jatqan azaptaý faktileri týraly jazdy.
"Búgin SI-18-ge Qańtardaǵy qandy qyrǵynǵa baılanysty jazyqsyz jalaǵa ushyraǵan eki balaǵa kirip shyqtym. Korıdorda aıaǵy aqsaqtaǵan, baldaqpen júrgen, ishten, ıyqtan, bastan jaralanyp, tańylǵan jastar óz advokattarymen kezdesý úshin kútip turdy.Tipti bireýin nosılkamen alyp keldi. İshiń qan jylaıdy, jáýdiregen kózderine qarap sharasyzdyqtan ernińdi tisteısiń, al syrttaı "aınalaıyndar shydańdar, eńseleriń túspesin, bári jaqsy bolady"- dep qanattandyrǵan bolasyń. Al meniń qorǵaýymdaǵy eki bala da "aǵa óltirip turyp birneshe kún urdy, qan sıgizdi, istemegendi istedim degizip hattama jasady, qol qoıǵyzdy, mıtıńige shyqqannan basqa jazyǵymyz joq"- dep zar ılep otyr. "Dáleldemesiz sottaı almaıdy, zańsyz toltyrylǵan hattama úkimge negiz bolmaıdy"- dep úmittendirip kettim. Árıne barlyq kúsh jigerimdi olardy aqtaýǵa jumsaımyn, biraq átteń..." deıdi quqyqqorǵaýshy sharasyzdyqtan.
Shynqýat Baıjanov "osyndaı jaǵdaılar týraly únsiz qalýǵa bolmaıdy, qazirgi ýaqytta azaptaý, qýǵyndaý derekterin tek áshkereleý, jarıalaý arqyly toqtata alamyz" deıdi.
– Qorǵaýymdaǵy eki balanyń taıaq jegeni týraly jazbam áleýmettik jelide biraz rezonans týdyrdy. Artynsha búgin maǵan habarlasyp, eki balanyń biriniń shaǵymyna baılanysty olardy urǵandardyń ústinen is qozǵalǵanyn aıtyp jatyr. Ókinishke qaraı, mıtıńke shyqqany úshin ustalyp, soqqyǵa jyǵylyp jatqandar kóp. Quzyrly organdar shash al dese, bas alyp jatyr. Mundaı jaǵdaılardy toqtatýdyń birden bir joly – aıtý, jarıalaý. Zańsyzdyqtardyń bolyp jatqanyn joǵaryǵa jetkizý. Azaptaýdy qoǵam bolyp jumylǵanda ǵana toqtata alamyz, – deıdi quqyqqorǵaýshy.
Shynqýat Baıjanov qoǵamdyq komısıa qurý týraly túrli bastamalar kóterilip jatqanyn kórip júrgenin, ondaı komıassıa quramyna zańsyzdyqtardy jaýyp, búrkemeleýge kónbeıtin, ymyraǵa kelmeıtin adal adamdar kirýi kerek degen pikirde.
Pikir qaldyrý