Soltústik Koreıa bıligi horeograf pen onyń birneshe shákirtin tutqynǵa aldy. "Horeograf sheteldik BAQ arqyly shákirtterine kapıtalısik "bı qımyldaryn úıretken" dep habarlady Soltústik Koreıa aqparat kózderi. 

2020 jyldyń sońynda Soltústik Koreıa azamattardy negizinen kapıtalısik elderdiń, ásirese Ońtústik Koreıa men AQSH-tyń buqaralyq aqparat quraldaryn qaraýǵa nemese taratýǵa baılanysty kóptegen quqyq buzýshylyqtar úshin jazalaıtyn "Reaksıalyq oılar men mádenıetti joıý týraly" qatal zań qabyldady. Aýyr qylmys jasaǵandar úshin ólim jazasyna kesiledi.

Sondaı-aq bul zań arqyly kólik áınekterin qarańǵylaǵany úshin júrgizýshiler, ońtústikkoreıalyq stıldegi sóıleý men slengti paıdalanǵany úshin stýdentter jazalanady. Al endi horeograftarǵa jastardy sheteldik estrada juldyzdarynyń qımyldaryn úıretkeni úshin jazalaýǵa qoldanyldy.

Daily Mail aqparatyna sáıkes, memlekettik qaýipsizdik departamenti men polısıanyń birlesken operasıasy antısosıalızmge qatysty tergeý júrgizip, ońtústikkoreıalyq fılmderdi kórgen jáne sheteldik basylymdardy oqyǵan adamdardy qarqyndy túrde qýdalaýda.

Bıylǵy jyly antısosıalızmge qarsy ınspeksıa toby oı men mádenıet týraly zańnyń oryndalýyna barynsha uqypty bolǵan.

"Horeografty qýdalaý bolǵan jerde jalpaq ekrandy teledıdarǵa sheteldik ánder men bı beıneleri bar USB flesh-dıski jalǵanǵan" deıdi soltústikkoreıalyq derekkózder.

"Jasóspirim stýdentter ekrandaǵy horeografıa arqyly bıleýdi úırengen. Antısosıalızmge qarsy tekserý toby flesh-dıskini tartyp alyp, nusqaýshy men barlyq stýdentterdi shtab-páterine alyp ketti" dep habarlandy.

Aqparattar boıynsha horeograf áıel Phenson óner ýnıversıtetinde horeografıa mamandyǵy boıynsha bilim alǵan. Birneshe jyl buryn ol Phensondaǵy Okchon orta mektebine sabaq berýge jumysqa turǵan.

"Biraq muǵalimniń bar bolǵany 3000 von aılyq jalaqysyna ómir súrý qıyn boldy [AQSH. $0,60], sondyqtan ol óz úıinen jeke bı akademıasyn ashý arqyly ómir súrdi" deıdi atyn atamaýdy ótingen turǵyn.

"Olar (shákirtter) Soltústik Koreıa stılinde emes, Ońtústik Koreıa, Qytaı jáne Amerıkadaǵydaı bıleýdi úırenýdi jón kórdi. Osylaısha, horeograf olarǵa solardy úıretti" deıdi turǵyn.

Ortalyq Komıtet "Raksıalyq oı men mádenıetti joıý týraly" zańdy buzǵandardy dárejesine, synybyna qaramastan qatań jazalaýdy buıyrǵandyqtan, bul joly ustalǵan horeograf pen stýdentter aýyr jazadan qutylmaıdy. "Olardyń ata-analary da partıadan shyǵarylyp jazalanýy múmkin" dep habarlady derekkóz.